A alcaldesa de Teo ‘contundente’ tras a negativa de Santiago a ampliar a liña 6: «O informe non ten sentido ningún»

A alcaldesa de Teo, Lucía Calvo de la Uz, criticou duramente a negativa do Concello de Santiago de Compostela a ampliar a liña 6 de autobús urbano, que actualmente chega ata o núcleo dos Tilos, ata a rotonda do Gadis de Cacheiras. Esta ampliación, proposta pola rexedora teense en agosto de 2023, pretendía conectar coa capital galega a preto de 9.000 persoas que viven nas parroquias dos Tilos e Cacheiras, facilitando os seus desprazamentos laborais e académicos.

A rexedora destacou que esta mellora sería substancial para a veciñanza de ambos concellos, reducindo o tráfico rodado cara a Santiago e favorecendo o respecto polo medio ambiente. Lucía Calvo de la Uz mostrouse perplexa ante a negativa de Santiago, lembrando que o propio Concello compostelán anunciou recentemente unha liña que une tres concellos (Santiago, Ames e Oroso) cunha frecuencia de 30 minutos, algo que «celebra». Ademais, subliñou que o custo da ampliación ata Cacheiras sería asumido polas arcas municipais de Teo, polo que non suporía un problema orzamentario para Santiago.

Ante esta situación, a alcaldesa anunciou a implementación dunha liña piloto dun bus lanzadeira que conectará os núcleos da Ramallosa, Cacheiras e Montouto coa liña 6 en Os Tilos, cun transbordo gratuíto para os usuarios. En declaracións en directo este luns nos micrófonos de Radio Líder Santiago, Calvo de la Uz lamentou a tardanza na resposta do Concello de Santiago a unha solicitude que se formulou hai case un ano e cuestionou os cálculos que fixan o custo da ampliación en 1,8 millóns de euros. A rexedora teense afirmou que «non é razoable o tempo de espera» e tamén puxo en dúbida a necesidade de comprar un novo autobús e contratar cinco condutores adicionais, como sinala o informe do Concello de Santiago, insistindo en que a ampliación sería de apenas dous quilómetros e medio e cinco minutos máis de percorrido. «Non ten sentido ningún», conclúe.

A entrevista completa, no seguinte enlace.