Listeners:
Top listeners:
Radio Líder Santiago – 97.7Fm Santiago de Compostela
today11 junio, 2024
11/06/2024 A Rede de Centros Socioculturais prepárase para uns meses moi intensos, con ducias de actividades no programa «Vive o verán». Música en directo, exposicións, actividades deportivas ou roteiros, fan parte dunha proposta na que se prevé a participación de máis de 3.000 persoas, «pensada para chegar a públicos moi diversos, e que ten como obxectivo que os veciños e veciñas desfruten do verán redescubrindo o seu municipio, con actividades de lecer, educativas, e que fomentan as relacións sociais e o tempo compartido». A programación foi presentada hoxe en rolda de prensa polo concelleiro de As Mobilidade, Convivencia e Centros Socioculturais, Xan Duro.
O programa «Vive o verán» incorpora este ano 26 actividades distintas e un total de 155 sesións. Tal e como explicou Xan Duro, «hai moitas propostas para as familias, específicas para o público infantil, pero tamén moitas actividades pensadas para persoas adultas». Agás nos espectáculos ao aire libre, as diferentes actividades teñen límite de prazas e é precisa a inscrición previa.
As actividades artéllanse en torno a seis bloques temáticos: Verán en familia, Verán nos parques, Paseando no Verán, Actividades de verán nos centros socioculturais, Espectáculos de Verán e exposicións. A eles súmanse os Clubs de Verán, o programa de conciliación na rede de centros.
Verán en familia
A programación de verán comenzará cunha das propostas pensadas para as familias: unha quedada intercentros na Praza da Quintana, que terá lugar na tarde do martes 25 de xuño, e que estará chea de xogos e actividades. Haberá prazas para 100 persoas, e as inscricións deben facerse no centro sociocultural de Vite.
Xa ao longo do mes de xullo, desenvolveráse a actividade «Argallando no carballo». Será nas tardes dos martes e dos xoves, cada xornada nun punto e cunha actividade diferente. Así, haberá talleres de debuxo, de arxila ou de elaboración de coroas de flores, en puntos como a Finca do Espiño, o Paxonal, en San Lourenzo, na granxa do Xesto ou en Monte Viso. Desta maneira, as persoas participantes «non só poderán desfrutar de obradoiros lúdicos que fomentan a creatividade, senón que tamén coñecerán mellor diferentes espazos verdes de Santiago».
Seguindo a mesma liña, unha das novidades deste ano serán as «Veladas nocturnas para as familias», con dúas citas no mes de xullo: a representación da obra «Feira das Sementes», de Babaluva Teatro, o 3 de xullo no espazo exterior do centro sociocultural de Santa Marta; e o contacontos musical «Lúa triangular, nada é imposible» de Jara Ortiz, o 17 de xullo na carballeira de San Lourenzo.
Actividades nos parques e paseos
Os parques teñen un gran protagonismo no programa «Vive o Verán», e serán tamén escenario de diferentes actividades saúdables, creativas e divertidas. Así, haberá clases de Tai Chi e Chi Kung en espazos como o parque de Penedo de Conxo, o parque de Santa Marta, o Parque do Cotaredo, o porque do centro sociocultural Maruxa e Coralia ou o Campus Sur; ou de danza nos parques de Galeras e Eugenio Granell. Tamén están previstos obradoiros de debuxo ao aire libre na cidade da Cultura, na zona histórica e no museo de ciencias naturais da Universidade de Santiago; ou clases de defensa persoal para adolescentes na praza José Saramago de Vite.
Para coñecer o entorno natural de Santiago e a súa historia, no programa «Vive o verán» incluíronse diferentes paseos e roteiros. Así, haberá rutas á procura das herbas de San Xoán nos diferentes barrios; ou para aprender a identificar as plantas medicinais. Tamén están previstos paseos para coñecer as parroquias de Figueiras ou Vidán, un percorrido guiado para descubrir as gárgolas da cidade histórica; ou dúas rutas nocturnas con perspectiva feminista, sobre o papel das mulleres na historia de Santiago.
As propostas de paseos complétanse con dúas rutas circulares para coñecer mellor os parques biosaudables de Compostela: unha desde Conxo pasando polo Ensanche e Santa Marta, e a outra percorrendo o Romaño, Vite e Fontiñas.
Actividades de verán nos centros
Ademais, nos propios centros socioculturais manteráse unha intensa actividade ao longo de todo o mes de xullo, con propostas moi diversas en cada un deles. En Vite funcionará a aula de xogo e a biblioteca de luns a venres, e a aula de informática faráo de mércores a venres. No CSC das Fontiñas haberá sesións de escape room os martes de xullo e xogos de pistas os venres; no Ensanche haberá diferentes propostas formativas vinculadas ás novas tecnoloxías; e no Romaño prevénse obradoiros de cociña nas tardes dos martes. O CSC Maruxa e Coralia tamén terá en xullo diferentes actividades para todos os públicos, vinculadas a novas tecnoloxías, reciclaxe ou debates sobre temas de actualidade; e en Figueiras terá lugar un obradoiro de pintura con elementos naturais. Ademais, os centros do Ensanche, Fontiñas e Romaño estarán abertos en horario de tarde ao longo do mes de xullo.
A oferta de «Vive o verán» complétase con diferentes espectáculos, algúns deles programados pola propia rede, como é o caso do concertos do ciclo Terraceamos +, outros incluídos na rede cultural da Deputación da Coruña, e outros enmarcados no Festival Internacional Atlántica. Tamén se poderán ver diferentes exposicións: «Espazos Socioculturais en trazos», cos debuxos realizados por David Orihuela dos diferentes locais da rede de CSCs; a mostra de maquetas de estacións do ferrocarril «O primeiro camiño de ferro en Galicia», ou a do «Museo máis pequeno da cidade».
Por último, ao longo do mes de xullo, os centros socioculturais rurais e urbano poñen en marcha os seus clubs de verán, para facilitar a conciliación da vida familiar e laboral.
A programación pode consultarse na web do concello, nas redes sociais dos Centros Socioculturais, e nos mesmos centros. A información das distintas actividades pode descargarse escaneando o código QR que aparece no folleto informativo, cos detalles sobre o procedemento e lugar de inscrición.
Escrito por Líder Redacción
centro socioculturais compostela programacion radio lider santiago santiago veran
Toda la actualidad de la mañana en Espresso de Mediodía. El informativo de autor, de lunes a viernes de 14.00 a 14.30 horas con el veterano periodista Javier González Méndez.
closeCopyright © 2023 Radio Líder Santiago de Compostela - 97.7 Fm
Comentarios de las entradas (0)