Bota a andar en Compostela a cuarta edición de «Somos Cultura»

04/03/2024.- Neste mes de marzo, as redes sociais encheranse de contidos audiovisuais para animar o consumo cultural e poñer en valor a fortaleza das industrias culturais de Santiago. Será no marco da campaña «Compostela Somos Cultura», impulsada desde a Concellaría de Promoción Económica, e que chega á súa cuarta edición. O edil do departamento en funcións, Xan Duro, presentou hoxe o programa, nunha rolda de prensa na que participaron o director artístico do proxecto, Xacobe Martínez Antelo, e a técnica da Concellaría de Promoción Económica, Carme Casado.

O concelleiro de Promoción Económica en funcións, Xan Duro, explicou que o proxecto «comezou en 2020 para reactivar o consumo cultural no contexto da pandemia da Covid, e mantívose co obxectivo de reivindicar a importancia do sector, non só en termos estrictamente culturais, senón tamén por razóns económicas e de creación de emprego». Nese sentido, apuntou o edil, esta campaña «está directamente aliñada coas premisas da Axenda Urbana 2030, que prevé diferentes accións para converter a Santiago en centro catalizador da producción cultural en Galicia».

Precisamente, a Axenda Urbana 2030 está moi presente na cuarta edición de «Compostela Somos Cultura», que pón o foco de maneira transversal noutros obxectivos dese documento como a igualdade de xénero, a revitalización do comercio local, e mesmo a economía sostible. Neste sentido, apóstase por unha comunicación e marketing sen residuos, nos que non se emprega nin cartelería nin panfletos, senón produtos reutilizables, sostibles e biodegradables, como é o caso dun marcapáxinas biodegradable con sementes dentro.

Sete microeventos

A campaña de promoción das industrias culturais que se desenvolverá nos vindeiros meses ten a súa orixe nos sete microeventos culturais que xa se celebraron no mes de decembro, e que agora chegarán ao gran público a través das redes sociais. Eses eventos foron concebidos co obxectivo de mostrar a diversidade das industrias culturais en Santiago e o talento en diferentes disciplinas. Así, na programación houbo música, con Suelen Estar Quartet e Gloria Pavía; danza, con Kirenia Martínez; teatro e narración oral con Celso San Martín e Borja Fernández; fotografía, con Lorena Cao, e literatura, con Camilo Franco.

As súas intervencións realizáronse desta volta en espazos culturais como librarías e bibliotecas de Compostela, «seguindo a liña iniciada nas anteriores edicións do programa, que chegou espazos que habitualmente non son habitados polos e polas artistas», tal e como destacou Xacobe Martínez Antelo. O director artístico de «Somos Cultura» tamén salientou que ao longo das catro edicións do proxecto, «o 80% dos e das artistas ou viven ou teñen unha relación directa con Santiago, que é claramente a cidade na que habita o tecido creativo en Galicia e a que debe reivindicarse como capital cultural». Nese sentido, salientou que o Ciclo «conseguiu abrir unha fiestra á curiosidade pola creación, ao talento de proximidade, á fachenda polos nosos artistas, e a redescubrir da man deles, novas visións da nosa cidade».

Dos microeventos celebrados en decembro xurdiron produtos audiovisuais que serán difundidos nas próximas semanas a través das redes sociais de «Compostela Somos Cultura». En anteriores edicións, o alcance real nas redes sociais do proxecto foi de máis de 200.000 persoas, e case 5.000 persoas conforman a comunidade de seguidoras das redes sociais do proxecto».

Sorteos de paquetes culturais

No marco da campaña realizaranse, a través das redes, sorteos de diferentes paquetes culturais, un por semana e máis un sorteo final. Asociados ao cancelo #CompostelaSomosCultura, nestes sorteos repartiranse diversos produtos culturais e artísticos mercados nas tendas e espazos culturais de Compostela, dende librarías, tendas de música, espazos formativos culturais, cines ou tendas de artesanía, entre outras.