Música e cine, as propostas máis votadas nos Orzamentos Participativos de Xuventude

Case 1.400 persoas participaron na fase de votación dos Orzamentos Participativos da área de Xuventude, un proceso no que os mozos e mozas decidiron o destino de 100.000 euros do presuposto municipal. Ao longo de todo o ano executaranse as oito propostas que recibiron máis apoios, entre as que destacan iniciativas relacionadas coa música e co cine. A concelleira de Dereitos e Servizos Sociais, Promoción Económica e Xuventude, María Rozas, destacou a alta participación.

Os 100.000 euros destinados aos Orzamentos Participativos de Mocidade permitirán executar as oito propostas máis votadas polos mozos e mozas. A que obtivo un maior apoio foi a denominada “Cine e música baixo as estrelas”, unha proposta que pretende difundir o traballo de novos e novas creadoras, tanto no eido do audiovisual como da música, con sesións que xuntarán as proxeccións cos concertos. En segundo lugar situouse a  celebración dun torneo de fútbol 7 e, por detrás desta proposta, a da celebración dunhas xornadas de difusión do voluntariado no Refuxio de animais de Bando e das entidades protectoras.

O cuarto posto foi para a celebración de concertos gratuítos de artistas actuais en horario de atardecer, e en quinto lugar os mozos e mozas votaron pola celebración de cursos teórico-prácticos de primeiros auxilios e actuación en caso de emerxencias como incendios ou accidentes de tráfico.

A música volve protagonizar a sexta proposta máis votada: un festival de música urbana, con concertos, shows de break dance ou exhibicións de freestyle. En sétimo lugar, atópase a proposta dun ciclo de cine ao aire libre, centrado nas películas clásicas de Disney e, por último, celebrarase un concerto con artistas actuais xa coñecidos pola mocidade.

Estas oito propostas foron as que recibiron máis apoios das 103 que foron sometidas a votación, divididas en doce áreas temáticas. En total, na primeira fase dos Orzamentos Participativos recibíronse un total de 194 propostas, pero moitas delas eran coincidentes e foron unificadas para a fase de votación, e outras non cumprían os requisitos técnicos do proceso. Tal e como explicou María Rozas, “ainda que o orzamento nos permite executar as oito propostas máis votadas, a concellaría de Xuventude terá en conta outras ideas que consideramos moi interesantes á hora de deseñar a súa programación para o resto do ano.

Preto de 1.400 participantes

Nesta edición dos Orzamentos Participativos da área de Mocidade participaron 1.381 persoas, un 20% máis que o ano pasado, das que 1.270 cumprían os requisitos de votación. Por número de votos, recibíronse un total de 4.143, dos que 3.810 foron efectivos. Só un 8% do total de votos non se consideraron válidos, ben por non cumprir os requisitos da persoa para poder votar, ou ben por non atender a obriga de votar tres propostas diferentes.

En canto ao perfil do votante, o 62% foron mulleres, e o 41% mozos e mozas nadas entre 2007 e 2008. O incremento de votación nesta franxa de idade responde á implicación dos institutos en todo o proceso dos Orzamentos Participativos. Neste sentido, a concelleira de Xuventude agradeceu a implicación dos centros educativos “tanto dos institutos como da Universidade, con mesas de votación, pero tamén con puntos informativos para recoller propostas”. En concreto, houbo 20 mesas informativas en institutos, bibliotecas, no Centro Xove da Almáciga, e lugares de ocio e, como novidade, na sede da Fundación Down “como unha aposta pola inclusión real das persoas con diversidades”.