Paula Prado: “Sacar rédito electoral dunha catástrofe é absurdo e a cidadanía non o entende»

Paula Prado lamenta o uso de anuncios en redes sociais por parte do PSOE para culpar a Mazón de aspectos da traxedia, argumentando que “sacar rédito electoral dunha catástrofe é absurdo e a cidadanía non o entende». Ademais, Prado sinala que “se Mazón tivo algunha responsabilidade, xa haberá tempo de determinala”, defendendo que a prioridade debe ser axudar á recuperación das zonas afectadas, en lugar de fomentar tensións políticas.

Outro dos temas destacados foi a recente imputación de Íñigo Errejón, acusado dun presunto delito de agresión sexual. Prado mostrou a súa indignación ante o que considera un “encubrimento” por parte de membros do Goberno. “Pasamos de ter un goberno de perdedores a ter un goberno de encubridores”, sinalou Prado, apuntando a figuras como Yolanda Díaz e Mónica García. “Un goberno que encubre agresións sexuais é un goberno que non pode representar aos dereitos das mulleres”. Prado criticou especialmente a líder de Sumar, á que sinalou por non denunciar un caso de posesión e distribución de contido pedófilo cando era edil en Ferrol. Segundo Prado, Díaz “agochou” a situación en lugar de actuar, permitindo que o asesor implicado permanecese no seu cargo e mesmo o incorporou máis tarde ao Parlamento de Galicia. “Foi a única vez na historia que a Policía Nacional entrou no Parlamento galego para deter a alguén, e por un caso de pedofilia,” comentou Prado, lamentando que agora Díaz se erixa como representante do feminismo e demandando a súa dimisión por responsabilidade política.

Prado tamén abordou a situación lingüística en Galicia, defendendo o que chama “bilingüismo harmónico” en lugar de políticas monolingües promovidas polo Bloque Nacionalista Galego (BNG). Explicou que os galegos empregan o galego e o castelán de forma “natural” e sen imposicións, un valor que o PPdeG quere preservar. “Para que máis xente fale galego, hai que amalo e empregalo libremente, non impoñelo”, afirmou, destacando que a imposición pode ter o efecto contrario.

A parlamentaria tamén dirixiu críticas aos nacionalistas xa que consideran unha postura de negativa constante ante calquera proposta de goberno. “Para o BNG, todo está mal: a sanidade está mal, a educación está mal, a política industrial tampouco serve, e a medioambiental tampouco,” sinalou, lamentando que o Bloque rexeite iniciativas incluso cando promoven avances sociais ou ambientais. «O BNG actúa como o partido do non, opoñéndose a proxectos de enerxía renovable, desenvolvemento industrial e outras medidas clave para Galicia». Segundo Prado, esta postura limita as oportunidades de crecemento e emprego na comunidade, e destacou que “o futuro de Galicia non se constrúe con negativas, senón con propostas e colaboración”.

Doutra banda tamén compartiu con Álvaro Veiga, director da emisora, os detalles do novo orzamento 2025, describíndoo como “o máis alto da historia de Galicia” e un compromiso firme co benestar da cidadanía. Entre os investimentos principais destacan a sanidade, a vivenda e a educación, cun gran impulso á vivenda pública, especialmente para familias con fillos pequenos. “Non podemos elevar a categoría xeral a problemas puntuais; o obxectivo é chegar a máis familias e ofrecerlles estabilidade e calidade nos servizos”, subliñou Prado.

Na recta final, Paula Prado reafirmou o apoio a Borja Verea, presidente do PP en Santiago e gañador das pasadas eleccións. “Borja é un candidato comprometido, preparado e con proxectos claros para Santiago”, dixo Prado, engadindo que a cidade precisa un líder que valore tanto a identidade como o desenvolvemento cultural e económico.

A líder do PPdeG sinalou que Borja Verea representa un cambio necesario para Santiago, especialmente ante a súa preocupación polo que ela describe como “turismofobia” no Concello. “Non podemos permitirnos unha turismofobia; Santiago é o terceiro centro de peregrinación do mundo e merece estar no mapa con orgullo”, afirmou, destacando que o turismo non é un inimigo senón un recurso. Prado criticou que o Concello non esté apoiando aos negocios locais e que a cidade presente problemas de limpeza e infraestruturas abandonadas, o que está a prexudicar a súa imaxe e o seu potencial como destino turístico.

Finalmente explicou que os acordos entre as administracións son fundamentais para abordar os problemas da cidade e expresou o compromiso da Xunta para colaborar co Concello. Con Borja Verea como candidato, Prado confía en que Santiago poderá recuperar o seu papel como unha cidade “aberta e vibrante”, que serve tanto á súa comunidade como aos visitantes.

A entrevista completa, no seguinte enlace.