A obra da estación de tren de Santiago estará lista en maio e levará o nome de Daniel Castelao

O delegado do Goberno en Galicia, Pedro Blanco, avanzou hoxe a culminación no vindeiro mes de maio da obra de construción do novo edificio de viaxeiros de ADIF en Santiago, coa que “este Goberno volve cumprir coa capital de Galicia e coa mellora integral das súas comunicacións”. Así llo trasladou á alcaldesa de Santiago, Goretti Sanmartín, nunha reunión celebrada no Pazo de Raxoi, á que asistiu co director xeral de Negocio e Cliente de ADIF, Juan Pablo Villanueva.

No encontro, o delegado confirmou que a nova terminal levará como denominación “Estación de Santiago-Daniel Castelao”, o que fará que “as dúas principais entradas de viaxeiros nesta cidade, o aeroporto Rosalía de Castro e a Estación Daniel Castelao, falen da nosa historia e da nosa cultura”, valorou. Para poñer en valor esta denominación, a nova estación acollerá, con motivo da súa apertura, unha exposición temporal sobre a figura de Castelao. Posteriormente, manterase unha exposición permanente de figuras e motivos “que enxalzan a personalidade de Castelao e que se distribuirán polos espazos públicos da estación”, engadiu Pedro Blanco.

Xunto a esta obra, na reunión analizouse a modificación do proxecto do aparcadoiro, para sumar 900 prazas dispoñibles cun investimento de 9 millóns de euros. A previsión é que este servizo estea operativo no verán de 2026. 

Compromiso cumprido

O delegado do Goberno remarcou que a nova terminal se suma ao conxunto de proxectos e de actuacións que executa o Goberno en Santiago, e nas que conta coa colaboración do Goberno Municipal.

Tras sinalar que “estamos adiantando pola dereita os efectos de anos de atrancos e de parálise de anteriores gobernos”, o delegado detallou algunhas das obras que están a transformar a mobilidade, o uso público do patrimonio e as comunicacións na capital de Galicia e mellorar as condicións ambientais. Entre elas mencionou a nova depuradora da Silvouta, en execución; a futura remodelación da pista do aeroporto Rosalía de Castro, e a reforma integral do Hostal dos Reis Católicos, que se presentou esta mesma semana. 

Novo edificio de viaxeiros

O Ministerio de Transportes e Mobilidade Sostible inviste no novo edificio de viaxeiros da estación de tren de Santiago 30 millóns de euros a través da empresa ADIF Alta Velocidade. 

O novo edificio elévase sobre a praia de vías xa existente, apoiándose nas plataformas con soportes puntuais. Forma unha unidade volumétrica coa pasarela peonil sobre vías, desde a que terá acceso e conectará a rede urbana, a estación ferroviaria e a terminal de autobuses, mellorando a actual contorna de intermodalidade para a cidade de Santiago. Para a súa execución acondicionáronse as plataformas existentes, establecendo un sistema de conexións verticais que une o vestíbulo principal, situado a un nivel superior, coa zona de uso ferroviario. 

En paralelo, ADIF realizou as obras de adecuación necesarias no antigo edificio de viaxeiros para adaptalo á conexión de Galicia á rede de alta velocidade, permitindo que Santiago puidera beneficiarse da entrada en servizo desta nova conexión.