As pulseiras de O Son do Camiño poderán retirarse días antes en As Cancelas

Os asistentes a O Son do Camiño que teñan abono para os tres días ou entradas diarias para o xoves poderán recoller a pulseira de acceso ao recinto a partir do día 27, evitando así as colas na entrada do Monte do Gozo. A organización habilitará un punto de entrega de pulseiras previas no centro comercial As Cancelas. Este servizo estará dispoñible tanto o día 27 como o martes e mércores seguintes, de 16:00 a 21:00 horas. O día 30, día de comezo do festival, o servizo neste punto estará operativo de 10:00 a 14:00 horas. É a primeira vez que se permite a recollida tan anticipada, xa que no ano pasado a pulseira só se podía obter media hora antes da apertura do recinto.

Tanto os abonos do festival como as entradas para o primeiro día están esgotados. O xoves 30, nos dous escenarios principais, actuarán Green Day, J Balvin, Arde Bogotá, Fernandocosta, The Interrupters, Mattn, Hot Milk, Berto e Maryland. O venres, con máis entradas dispoñibles, presentaranse Pet Shop Boys, Myke Towers, Love Of Lesbian, Natos y Waor, Icona Pop, La Oreja de Van Gogh, Recycled J, Judeline, Marilia Monzón e Monoulious DOP. O sábado pecharán a nova edición do festival Thirty Seconds To Mars, Melendi, Tom Odell, Rels B, Wade, Ana Mena, Baiuca, BB Trickz, Carlos Ares e New Wave Kill. Ademais, nesta edición darase un maior protagonismo á música electrónica, que terá un cartel máis amplo no terceiro dos escenarios.