Blas García prevé 40.000 habitantes en Ames nos próximos dez anos

Na entrevista concedida a Radio Líder Santiago, o alcalde de Ames, Blas García, fixo un repaso exhaustivo da situación vivida tralo apagón masivo do día anterior que afectou a toda España e Portugal. García destacou a resposta coordinada do Concello ante a falta de subministración eléctrica e de comunicacións: “Desde as dúas da tarde quedamos sen comunicación móbil en todo o Concello, algo que teremos que revisar coas operadoras”.

A primeira medida foi garantir a atención aos máis vulnerables e manter os servizos básicos. “Convocamos unha reunión de coordinación e o primeiro foi asegurar a comida dos 1.500 nenos e nenas dos comedores escolares”.

A atención sanitaria tamén foi prioritaria: “O primeiro xerador colocámolo no centro de saúde de Bertamiráns para manter frías as vacinas”.

A situación, que Red Eléctrica xa cualificou como un fallo técnico excepcional e non un ciberataque, serviu para reflexionar: “É moi difícil vivir sen móbil ou internet, pero podemos facelo. Onte moitos redescubriron o parchís ou as cartas nas terrazas”.

En canto á comunicación coas veciñas e veciños, o rexedor destacou a importancia dos medios tradicionais: “A radio foi fundamental. Aqueles que tiñan radios con pilas puideron informarse. Hai que pensar en dotalas de xeradores para futuras emerxencias”.

A nivel político, fixo un chamamento á responsabilidade: “Non podemos aproveitar todo para facer sangue política. Non creo que houbese un só alcalde ou alcaldesa que non fixera o posible polos seus veciños”.

Obras e futuro do Milladoiro

Outro dos temas destacados foi a humanización do Milladoiro, unha obra clave para o concello. “É unha obra que marcará un antes e un despois. Entendo as molestias, pero ninguén ten máis ganas ca min de que rematen”.

As obras avanzan, aínda que non á velocidade desexada, e prevese a súa finalización no primeiro semestre de 2026.

No pleno municipal tratarase a incorporación do Concello á asociación Ames Solar, impulsora das comunidades enerxéticas. “Poñemos tellados municipais a disposición para instalar paneis solares que beneficien aos veciños. É aforro, independencia enerxética e futuro”.

Tralo apagón, García considera que este modelo cobra aínda máis sentido: “As comunidades enerxéticas son a gran saída, tamén para empresas e administracións públicas”.

García tamén anunciou a creación de máis de 200 vivendas públicas no Milladoiro grazas a un convenio co IGVS. Ademais, prevé sacar á poxa cinco parcelas municipais para vivenda con promotores privados. “Estamos en 33.200 habitantes e, se todo vai con normalidade, chegaremos aos 40.000 nos próximos 10 anos”.