Boiro medra porque «está de moda»: o alcalde anuncia 1.000 novas vivendas á beira do mar

• José Ramón Romero analiza en Radio Líder os retos e avances do concello e confirma a súa presenza na protesta contra Altri

O alcalde de Boiro, José Ramón Romero, participou nunha entrevista en Radio Líder Santiago onde abordou os principais retos e proxectos do municipio. Durante a conversa, fixo balance da súa xestión, defendendo a mellora da situación financeira, o impulso á vivenda e ao polígono industrial e a aposta por servizos de calidade para os veciños. Ademais, reafirmou a súa oposición ao proxecto de Altri e confirmou a asistencia do Concello de Boiro á protesta que terá lugar o sábado 22 de marzo na Pobra do Caramiñal.

Un dos temas centrais da entrevista foi a posición do goberno local fronte á instalación da planta de fibra téxtil de Altri en Palas de Rei, un proxecto que xerou unha gran contestación social. O alcalde mostrouse contundente na súa postura e insistiu en que a súa preocupación radica nos efectos que esta industria podería ter sobre a comarca e, especialmente, sobre o abastecemento de auga: «Temos que defender os intereses dos nosos veciños e veciñas. O noso abastecemento de auga vén da mesma zona afectada, ao igual que a industria conserveira, que representa entre o 60 e o 70% da produción de toda España. Tamén o sector do marisqueo podería verse prexudicado. Non estamos en contra da industria en Galicia, pero debe cumprir parámetros medioambientais.»

O rexedor destacou que o proxecto presentado inicialmente era distinto ao que finalmente se está impulsando, polo que considera que se debe esixir transparencia e garantías medioambientais antes de que se poida levar a cabo: «O primeiro proxecto falaba dunha industria de fibra téxtil, pero agora estamos ante unha iniciativa con características distintas. A protección do noso entorno debe ser prioritaria.»

Por todo isto, Romero confirmou a súa presenza na manifestación do vindeiro sábado 22 de marzo na Pobra do Caramiñal, sumándose a outros alcaldes da comarca de Barbanza que tamén rexeitan o proxecto.

«Rebaixamos á metade a débeda e mantemos servizos de calidade»

O alcalde destacou que a situación financeira do Concello de Boiro mellorou notablemente nos últimos anos, pasando dunha débeda viva do 50% ao 23%: «Cando chegamos ao goberno, a situación económica era complicada. Nestes anos conseguimos reducir a débeda á metade, mantendo ao mesmo tempo un nivel alto de investimentos en infraestruturas e servizos públicos.»

Neste sentido, defendeu a recente subida do IBI ao 0,50%, argumentando que foi unha medida necesaria para garantir a estabilidade económica do concello sen poñer en risco o crecemento: «O IBI en Boiro estaba moi por debaixo da media galega. A suba supón uns 50 euros máis ao ano para unha vivenda media, pero para o Concello significa garantir mellores servizos sen frear investimentos importantes.»

Romero destacou que, a pesar da suba fiscal, o municipio mantén unha situación saneada e con capacidade para seguir desenvolvendo proxectos clave.

«Temos que atraer empresas para xerar emprego»

Outro dos grandes retos que o Concello de Boiro afrontará nos próximos anos é a ampliación do polígono industrial de Espiñeira, unha demanda crecente debido ao interese de novas empresas por instalarse no municipio. O alcalde asegurou que xa existe un anteproxecto para ampliar o solo industrial en 600.000 metros cadrados: «Cada semana contactan connosco empresas interesadas en instalarse en Boiro. Hai proxectos empresariais que prevén investir máis de sete millóns de euros, pero precisamos máis espazo para acollelos.»

O obxectivo do goberno municipal é que as obras comecen dentro da presente lexislatura ou, como moi tarde, en 2027: «O noso compromiso é deixar encamiñada a ampliación do polígono e, se é posible, iniciar as obras antes do final da lexislatura.»

 1.000 novas vivendas para impulsar o crecemento demográfico

A falta de vivenda tamén foi un dos puntos tratados na entrevista. O alcalde anunciou que este mesmo ano se presentará o proxecto de urbanización dunha nova área residencial con 1.000 vivendas, situadas entre a Avenida da Constitución e a praia de Barraña: «Boiro está crecendo, e iso tamén significa que hai unha demanda de vivenda moi alta. Este proxecto permitirá ofrecer novos fogares nunha zona privilexiada e con todos os servizos próximos.»

O proxecto, que estaba paralizado desde 2013, foi reactivado polo goberno local en 2019 e agora entra na súa fase definitiva: «Este ano encargaremos o proxecto de urbanización para que en 2026 poidamos comezar coa construción das vivendas.»

O alcalde tamén fixo referencia ás infraestruturas culturais e deportivas, destacando a ampliación da Casa da Cultura, que pasará de 284 a 525 butacas, así como a renovación do campo da Mina e a recuperación da piscina municipal: «Investimos máis dun millón de euros na posta a punto das instalacións deportivas. Ademais, dentro da Cachada estamos a traballar na creación de novas aulas multideporte.»

A relación entre o goberno local e a oposición tamén foi tema de debate na entrevista. O alcalde criticou a falta de iniciativa dos grupos da oposición, asegurando que a súa actividade foi escasa nos últimos anos. «Os plenos en Boiro son tranquilos porque temos unha oposición moi vaga. Durante dous anos apenas presentaron propostas e, cando o fan, moitas veces baséanse en bulos e críticas infundadas. A oposición debe ser construtiva, non limitarse a facer ruído sen aportar solucións reais para mellorar o concello,» afirmou. Con todo, recoñeceu que recentemente algúns grupos comezaron a aumentar a súa actividade, aínda que considera que o fan «só en negativo».

«Boiro está de moda»

Ao remate da entrevista, Romero fixo balance do seu mandato e destacou que Boiro se atopa nunha etapa de transformación e modernización: «O Boiro de 2025 é moi diferente ao de 2019. Agora somos un concello moderno, industrial, turístico e con moita enerxía.»

Sobre a súa posible candidatura ás eleccións municipais de 2027, deixou aberta a porta a continuar: «Para min é un orgullo ser alcalde de Boiro. Se os veciños confían en min, gustaríame seguir traballando por un Boiro mellor.»

Con todo, insistiu en que o seu foco segue sendo cumprir os proxectos pendentes antes de pensar no futuro político.