Compostela Aberta denuncia a «actuación desproporcionada» da Policía na manifestación a prol de Palestina

María Rozas durante a entrevista en Radio Líder Santiago

A forza política Compostela Aberta expresou onte o seu rexeitamento ante a actuación policial que tivo lugar durante a manifestación convocada pola «Coordenadora Galega de Solidariedade coa Palestina» en Santiago de Compostela. A mobilización, que se desenvolveu a pesar das adversas condicións meteorolóxicas, foi considerada un éxito de participación, pero quedou ensombrecida por incidentes protagonizados por axentes da Unidade de Intervención Policial (UIP) da Policía Nacional.

Nos vídeos difundidos, pódese observar o que Compostela Aberta cualifica como unha «actuación desproporcionada» por parte dos axentes. A organización pacifista criticou duramente o que consideran unha extralimitación no exercicio das súas funcións e esixen que se investigue de inmediato a secuencia dos feitos. «A policía debe garantir a seguridade das persoas, non poñela en perigo con actuacións coma esta», manifestaron nun comunicado.

Desde Compostela Aberta, que ten demostrado o seu apoio ao pobo palestino desde a súa fundación, insisten na necesidade de aclarar os feitos para garantir a credibilidade das institucións e a súa responsabilidade perante a cidadanía. Solicitan que se esclareza o ocorrido e que se tomen medidas contra calquera abuso de poder.

A formación lamenta profundamente que un evento que tiña como obxectivo denunciar os crimes de guerra en Gaza, e en toda Palestina, rematara con imaxes que consideran inapropiadas para unha cidade coma Santiago de Compostela.