Creativas Galegas distingue o traballo da Asociación Avante coas persoas con discapacidade no rural

Falamos en Radio Líder Santiago con Soledad Mato de Creativas Galegas e Gabriel Gothlin, director da Asociación de Persoas con Discapacidade Avante, protagonistas do mes de xullo da campaña 12 Comercios 12 Sensibilidades. A Asociación de Persoas con Discapacidade Avante, que traballa na zona rural, é a protagonista este mes, xunto con Creativas Galegas (Rúa Caldeirería, 36), do programa municipal ‘12 comercios, 12 sensibilidades’, promovido dende as concellarías de Dereitos e Servizos Sociais e Promoción Económica, lideradas pola edil María Rozas.

O representante de Avante lembrou que son unha asociación que ten usuarios de 9 concellos rurais e que realiza cada día “500 quilómetros para o transporte destas persoas”. Uns usuarios que durante estes días levarán a cabo no espazo de Creativas Galegas obradoiros de coiro.

Soledad Mato, de Creativas Galegas destacou que asociacións coma Avante o teñen máis difícil que outros centros máis grandes ou os ubicados en zonas urbanas. Desta maneira, Mato quixo poñer en valor o traballo loxístico que entidades coma Avante teñen que levar a cabo no rural galego para poder atender as demandas de usuarios de diversos municipios.

Ata este domingo 21 de xullo pódese visitar a exposición e venda de produtos elaborados por usuarios e usuarias da asociación. E este mércores 17 de xullo ás 19.00 h desenvolverase unha mesa redonda para falar sobre a realidade que viven día a día as persoas que están involucradas neste proxecto tan necesario.

Facer visibles para o conxunto da cidadanía os proxectos solidarios, así coma as iniciativas de comercio local, é a meta de ‘12 comercios, 12 sensibilidades’ que o Concello de Santiago pon en marcha durante este 2024. Unha idea que xurdira dun grupo de formación que en 2019, na Cámara de Comercio de Santiago, deu pé á creación dun grupo de traballo que busca promover a economía circular. Unha iniciativa coa que está a colaborar Radio Líder Santiago.

O colectivo está integrado por 12 mulleres que rexentan outros tantos comercios de diversos sectores e que se definen unidas pola empatía, resiliencia e sensibilidade social, firmemente convencidas de que a través dos nosos espazos podemos dar voz a asociacións que, cos seus proxectos solidarios, melloran a vida de moitas persoas e fan que as cidades sexan máis humanas.

Até o de agora conviviron os proxectos Águila Atlántica e Fundación Pictoaplicaciones, durante o mes de xaneiro; a xoiería José Antonio e Solidaridade Internacional Galicia, no mes de febreiro; a tenda Naf e o programa Vagalume, en marzo; o Centro Deportivo Atmósfera e mais ACEM (que traballa con persoas migrantes e refuxiadas), en abril; durante o mes de maio a Papelaría Xaquín e Agadea (asociación centrada no Alzheimer); e La Tienda de María e Acougo (Asociación de Familias de Acollida) o mes pasado.

Quedan por diante Maravalla e o Refuxio de Bando, en agosto; Cousas do Campo e Daqui Darrederee, en setembro; a xoguetaría EscondiT e a Obra Social de Pediatría, en outubro; María Brey Deseño e a Cociña Económica no mes de novembro; e QuenllaSCQ e lasolvidadas.org, para despedir o ano.

A entrevista completa, no seguinte enlace.