Falece Juan Castro, presidente da Escola de Música de Santa Cruz de Ribadulla, aos 55 anos

A Banda de Música de Santa Cruz de Ribadulla comunicou este xoves a triste noticia do falecemento de Juan Manuel Castro Fernández, presidente da súa Escola de Música, aos 55 anos de idade. A súa perda deixa un gran baleiro na comunidade musical e en todos aqueles que o coñeceron e compartiron con el momentos inesquecibles.

Popularmente coñecido como o pianista, Juan Castro era unha presenza constante nos ensaios e actuacións da Banda, sempre sentado detrás do piano, a pesar de nunca tocar un instrumento. A súa paixón pola música e o seu compromiso coa Escola fixérono unha figura clave dentro da agrupación, sendo un exemplo de dedicación e entrega desinteresada.

A Banda de Música de Santa Cruz de Ribadulla destacou o seu traballo incansable ao fronte da Escola, colaborando en todo o necesario e mantendo sempre unha actitude de apoio e impulso á formación musical. “Hoxe perdemos a unha persoa moi especial para nós, desas que deixan unha gran pegada sen pedir nada a cambio”, expresaron nun emotivo comunicado.

A noticia causou unha profunda conmoción entre os membros da Banda e da Escola de Música, así como entre amigos e coñecidos, que lembran con cariño a súa xenerosidade, a súa constante presenza e o seu amor pola música.

O velatorio de Juan Castro terá lugar no salón multiusos do tanatorio de San Mamed, en Vedra, mentres que os oficios fúnebres serán este venres ás 16:45 horas na igrexa parroquial de Santa Cruz de Ribadulla.

D.E.P.