Galicia activa os servizos de emerxencias ante a chegada dunha intensa borrasca

• O vento en terra suporá refachos de ata 100 quilómetros por hora desde primeiras horas da xornada de mañá e o temporal en todo o litoral galego acadará ventos do sur ou suroeste de forza 9 e mar combinada do oeste con ondas de ata sete metros esta madrugada
• Activarase tamén a alerta laranxa por chuvia desde esta madrugada
• Aconséllase consultar a páxina web do CIAE 112 (www.112galicia.org), que conta con información meteorolóxica e con ligazóns de interese
• A Comisión Escolar de Alertas suspende as actividades no exterior nos centros educativos de toda Galicia durante toda a xornada debido ás activacións da alerta pola Aemet e de MeteoGalicia

Santiago de Compostela, 8 de outubro de 2024.- A Xunta, a través da Dirección Xeral de Emerxencias e Interior da Consellería de Presidencia, Xustiza e Deportes, vén de activar a alerta laranxa por vento e chuvia en terra con refachos moi fortes e por temporal costeiro en todo o litoral galego. Por iso, co fin de garantir a seguridade dos bens e as persoas, o Centro Integrado de Atención ás Emerxencias 112 Galicia, advertiu da situación aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros. Deste xeito, a Xunta activou os servizos de emerxencias para estar previdos ante os episodios adversos.

Segundo a Axencia Estatal de Meteoroloxía (AEMET), o fenómeno meteorolóxico por vento comezará mañá a primeiras horas da mañá e estenderase a toda a comunidade con refachos de ata 100 quilómetros por hora. No que se refire ao temporal costeiro, espéranse desde esta madrugada ventos do sur ou suroeste de forza 8 que poden acadar ocasionalmente forza 9 rolando a noroeste, xunto con mar combinada do oeste con ondas de ata sete metros.

O nivel de alerta laranxa por chuvia agárdase que se inicie dende as primeiras horas desta madrugada no interior das provincias da Coruña e Pontevedra, no noroeste de Ourense e na zona do Miño en Pontevedra e Ourense por precipitacións de 80 milímetros en 12 horas.

A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

Ante os fortes ventos e chuvias recoméndase circular con precaución e informarse antes do estado das estradas, evitar pasar preto de árbores, paneis publicitarios, andamiaxes e obxectos que poidan ser derrubados polo vento, non atravesar zonas inundadas ou que poidan chegar a asolagarse, non aparcar nas ribeiras dos ríos, non utilizar vehículos lixeiros nin de pouca estabilidade e retirar todos os obxectos que poidan caer á rúa desde tellados, balcóns e ventas.

Aconséllase consultar a páxina web do CIAE 112 (www.112galicia.org), que conta con información meteorolóxica e con ligazóns de interese.

Centros educativos

Debido á activación da alerta laranxa por vento por parte da Axencia Estatal de Meteoroloxía (AEMET) e de MeteoGalicia, a Comisión Escolar de Alertas decidiu suspender durante toda a xornada de mañá as actividades no exterior nos centros educativos de Galicia.

Para o caso de que as circunstancias da localidade onde se atopa o centro supuxesen un risco superior ao declarado e pasase a unha declaración de nivel superior, as direccións poderán adoptar as decisións oportunas respecto das actividades extraescolares. Adicionalmente extremaranse as condicións de circulación do transporte con seguimento das condicións climáticas.