Gran fin de semana para un Compostela Esgrima en plena forma

O Club Compostela Esgrima viviu outra gran fin de semana competitiva, con presenza destacada en dúas frontes: a División IV da Liga Nacional de Equipos en Madrid e o Torneo Ranking Regional de Tordesillas, organizado pola Federación de Castela e León.

Na Liga Nacional por equipos, o Compos presentou dous conxuntos. O Compos 1 debutou con pleno de vitorias, mostrando un excelente nivel. Impuxéronse con solvencia ao Granada por 45-25 e ao Cardenal Cisneros madrileño por 45-23. O último duelo, fronte ao Club Acero de Cáceres, foi moito máis axustado, resolvéndose cun 45-43 nun final de máxima tensión que pechou con éxito Jorge Pazó. Xunto a el competiron Bieito Romero, Mateo Rodríguez e Adrián Penido, co obxectivo posto en acadar o número 1 do grupo e optar ao ascenso á División de Bronce.

Pola súa banda, o Compos 2, formado por Ramón Rey, Hugo Voyneau, Abraham Castro e Luca Puddu, tivo unha xornada máis complicada. Caeron fronte ao Bahía de Cádiz (33-45), ante o valenciano Jaume I (29-45) e no duelo máis axustado, fronte ao Tenerife (41-44). Con tres zurdos e un diestro, e con tres debutantes en competición estatal, o equipo busca coller experiencia e seguir medrando.

A actividade non rematou en Madrid: os oito tiradores aproveitaron a viaxe para competir ao día seguinte no Ranking Regional de Tordesillas. A experiencia resultou moi positiva, con tres compostelanos accedendo ao cadro final de 8, ás portas das medallas. O mellor clasificado foi Jorge Pazó, que caeu ante De los Mozos (Burgos) e rematou 5º. Xusto detrás quedaron Mateo Rodríguez, derrotado por Del Torno (Burgos) e 6º, e Ramón Rey, que perdeu ante Barbero (Palencia) e concluíu 7º.

A competición rematou coa vitoria de Juan Pérez Weber, do Valladolid.