Luar na Lubre pechará os actos da XXXII Festa do Melindre de Melide

A vila de Melide prepara os seus fogóns e os seus postos de repostería para acoller nos días 11 e 12 de maio a esperada XXXII Festa do Melindre, un evento que, declarado de Interese Turístico Galego, promete envolver a localidade nun ambiente doce e festivo.

Durante este fin de semana gastronómico, os asistentes terán a oportunidade de deleitarse coa exquisita repostería tradicional de Melide e da súa contorna. O protagonista indiscutible será o melindre, acompañado dos ricos e dos almendrados, verdadeiras delicias culinarias que conquistarán os paladares máis exigentes. Ademais, a festa ofrecerá unha ampla programación lúdico-festiva para todas as idades, sumándose así á lista das Festas de Galicia de Interese Turístico.

O concelleiro de Comercio do Concello de Melide, Xosé Igrexas deu a coñecer a programación deste evento nunha intervención este venres en Radio Líder Santiago.

O sábado 11, a festa arrincará coa apertura dos stands no Espazo Melindre e coa Feira de Artesanía de Galicia no Espazo Amendoado, ás 11.00 horas. A música da charanga Alambique dará comezo á animación musical ás 11.30 horas.

Ás 17.00 horas, os máis pequenos poderán desfrutar dun obradoiro infantil de pintura de mandís no espazo Amendoado, mentres que ás 20.00 horas, o espazo Melindre acollerá un showcooking con música en directo e degustación a cargo de Gorka Rodríguez.

O domingo 12, a xornada comezará ás 11.00 horas coa apertura dos stands, onde os asistentes poderán saborear os deliciosos melindres, ricos e almendrados. Ás 11.30 horas, o grupo Froito Novo protagonizará un pasarrúas.

Ás 12.00 horas, o comunicador Marcial Mouzo ofrecerá o pregoeiro, seguido pola entrega dos títulos de Emboaxadores e Emboaxadoras do Melindre.

Ás 17.30 horas, o espazo Melindre acollerá a actuación infantil de Uxía Lambona e a Banda Molona, mentres que ás 19.00 horas, no espazo Rico, dará comezo o concerto de Luar na Lubre, pechando así dous días de festa, sabor e tradición en Melide.

A entrevista completa no seguinte enlace.