Once alcaldes galegos piden ao papa León XIV que peregrine polo Camiño Francés no Xacobeo 2027

Once rexedores da Mancomunidade de Municipios do Camiño Francés, xunto con membros da Asociación Calle Mayor de Europa, trasladaron este mércores ao papa León XIV unha invitación oficial para realizar unha peregrinación polo Camiño de Santiago con motivo do próximo Ano Santo Compostelán de 2027.

A delegación galega participou na audiencia xeral celebrada na Praza de San Pedro, onde fixo entrega ao pontífice dun bordón xacobeo e dunha vieira de Sargadelos, dous dos emblemas máis recoñecidos dos camiñantes que chegan cada ano a Compostela. A proposta está enmarcada no programa cultural e espiritual “Almas do Camiño”.

Segundo explicaron a EFE a concelleira de Turismo de Arzúa e presidenta da Mancomunidade, Begoña Balado, e o comisario do proxecto, José Tono Martínez, León XIV mostrouse “agradablemente sorprendido” polo convite e mesmo suxeriu que “quizais” poida acompañar aos peregrinos nalgún treito da ruta.

A misiva entregada ao papa, asinada pola alcaldesa de Triacastela e presidenta da Mancomunidade, Olga Iglesias Fontal, anímao a percorrer parte do Camiño Francés, o itinerario máis transitado da rede xacobea e que discorre por once concellos galegos antes de alcanzar a capital compostelá.

Os representantes desta entidade destacaron que unha eventual presenza do pontífice no Camiño sería “un símbolo de esperanza e un chamamento global á convivencia e á paz”, ademais dun estímulo internacional para o Xacobeo 2027, que se celebrará cando o 25 de xullo volva coincidir en domingo e a Catedral de Santiago abra de novo a Porta Santa.