VIDEO | Sanmartín anuncia unha sanción a Urbaser por incumprimentos do contrato

26/04/2024 A alcaldesa deu conta en rolda de prensa da resolución do procedemento de sanción á empresa adxudicataria do servizo de recollida de residuos e limpeza viaria do Concello de Santiago debido a unha serie de incumprimentos no contrato. Na rolda de prensa, Goretti Sanmartín tamén anunciou a data da xuntanza cos representantes da Xunta sobre o novo aparcadoiro do complexo hospitalario para o vindeiro xoves 2 de maio ás 16:30 horas.

A alcaldesa detallou que o pasado 24 de febreiro o Concello abriu o expediente para a imposición de penalizacións á empresa que presta o servizo de recollida de residuos e limpeza viaria, por diversos incumprimentos das condicións recollidas no contrato asinado entre ambas partes o 21 de febreiro de 2022 e que entrou en vigor o 23 de maio do mesmo ano.

Entre os incumprimentos detectados nun informe previo á apertura do expediente, Goretti Sanmartín destacou unhas serie de infracións no relativo a persoal, «como a presenza dun único administrativo, en lugar de dous; ou dun único técnico de produción ata o mes de xullo de 2023, en lugar de dous» e un «déficit de persoal equivalente a 500 xornadas de peóns no servizo dedicado ao varrido manual de xaneiro a decembro de 2023».

Ademais tamén se identificaron incumprimentos relativos á «obriga de reservar, como mínimo, o 50% das novas contratacións a mulleres» xa que na instrución se constatou que «de 30 persoas só 8 eran mulleres» ou a «falta de medios e maquinaria» concreatado no atraso na posta a disposición ou na carencia dalgúns dos vehículos do servizo.

Segundo explicou a alcaldesa tamén se rexistraron «eivas na infraestrutura informática e tecnolóxica» así como «deficiencias na prestación do servizo específico de recollida de voluminosos». Ademais a empresa tampouco chegou a completar a substitución/reposición das 25 illas soterradas/ano comprometidas para o 22 de maio de 2023, provocando un «considerábel atraso acumulado no plan de traballo comprometido, xa que o 31 de decembro pasado unicamente se actuara sobre 23 delas».

Por todo isto, o expediente conclúe que a empresa é a responsable destas infraccións polo que o Concello imporá penalizacións que suman unha sanción total de 14.020 euros. A maiores, a rexedora detallou que «na facturación mensual estivéronselle a aplicando descontos directos por falta de medios humanos e materiais con respecto ás prestacións contratadas». En concreto «no ano 2023 deducíronselle 199.420 euros (sen IVE), que representan o 2,40% sobre o prezo de adxudicación, e no 2024 xa van 75.779 euros (0,91%).

Reunión CHUS

Durante a rolda de prensa, Goretti Sanmartín tamén anunciou a data da reunión do Concello coas consellarías de Infraestruturas e Sanidade para tratar a construción do novo aparcadoiro do complexo hospitalario e outras cuestións relacionadas coa contorna e os accesos. Unha xuntanza que terá lugar o vindeiro xoves 2 de maio ás 16:30h nas dependencias da Xunta e da que a alcaldesa agarda «que poida saír un acordo a este respecto».

A rexedora tamén valorou positivamente a entrada en funcionamento do novo aparcadoiro que acondicionou o Departamento de Obras e Proxectos, con 3.000 m2 e 151 prazas de estacionamento para dar servizo a persoas usuarias do CHUS mentres duren as obras de ampliación destas instalacións e agradeceu «o uso responsábel que se está a facer para que sexan destinadas a esa necesidade».