“Traballar, escoitar e dialogar”: Crujeiras marca a folla de ruta para a segunda volta na USC

• A candidata a reitora, sendo a candidatura máis votada tras obter o 41% dos votos na primeira volta, «queremos construír, entre todas e todos, o mellor goberno posible para a USC» afirmou
• Crujeiras comezou a súa axenda electoral no campus de Lugo con reunións abertas á comunidade universitaria para «concretar accións» do programa

Lugo, 27 de febreiro. A candidata a reitora da Universidade de Santiago de Compostela, Rosa Crujeiras, deu comezo esta mañá no campus de Lugo á campaña electoral da segunda volta co compromiso de «traballar centro a centro, escoitar, dialogar e compartir propostas» con toda a comunidade universitaria. A catedrática en Matemáticas afronta esta nova fase electoral tras ser a candidata máis votada na primeira volta, cun programa avalado polo 41% dos sufraxios, «un resultado que nos dá forza e responsabilidade», segundo manifestou.

Crujeiras explicou que nesta segunda volta «é hora de facer o máis importante: traballar centro a centro, escoitar, dialogar e compartir propostas coa comunidade universitaria». Neste sentido, a candidata avanzou que durante os vindeiros días manterá reunións con diferentes grupos de traballo abertos á participación de todos os sectores universitarios. «Queremos construír, entre todas e todos, o mellor goberno posible para a USC», afirmou.

A candidata salientou que a campaña para esta segunda volta preséntase «con moitos ánimos e coa vontade de seguir dialogando, de seguir escoitando a toda a comunidade universitaria que nos manifestou un amplísimo apoio na primeira volta». Nesta nova fase, o obxectivo non é presentar de novo o programa, senón «seguir traballando e mantendo xuntanzas cos distintos colectivos enfocadas a concretar máis accións das que tiñamos dentro do programa que presentamos para estas eleccións».