«A autovía AG-59 reducirá a 10 minutos o tempo de viaxe entre A Estrada e Santiago»

O alcalde de A Estrada, Gonzalo Louzao repasou os seus cinco primeiros meses á fronte do concello nunha entrevista en Radio Líder Santiago, xunto a Álvaro Veiga, onde destacou a importancia da nova infraestrutura da AG-59, o crecemento industrial e as melloras en servizos sociais, educación e saúde. Louzao subliñou que o seu mandato está centrado en mellorar as conexións por estrada cos concellos limítrofes, potenciar a industria local e mellorar a calidade de vida tanto no ámbito urbano como rural. Ademais, lanzou proxectos clave como a construción de vivendas de protección oficial e a ampliación do polígono industrial.

A Estrada é un dos concellos máis grandes de Galicia, con máis de 20.000 habitantes repartidos en 51 parroquias e 473 núcleos de poboación, o que o converte no concello con máis núcleos de poboación de toda España. A súa extensión, aínda que non é a maior en metros cadrados (superado por concellos como Fonsagrada ou Lalín), presenta un desafío único á hora de atender as necesidades de cada parroquia e garantir servizos axeitados a unha poboación tan dispersa.

Unha mellor conexión coa capital de Galicia: a AG-59

Un dos puntos fortes da entrevista foi a infraestrutura da AG-59, unha nova vía en fase de construción que conectará a A Estrada coa capital galega, Santiago de Compostela. Louzao explicou que esta vía reducirá o tempo de desprazamento a Santiago a só 10 minutos, o que suporá un cambio significativo para a poboación local, tanto a nivel de mobilidade como de desenvolvemento económico.

«Esta arteria principal vai permitirnos competir mellor en industria, servizos e poboación», afirmou Louzao.

A nova infraestrutura non só mellorará a conectividade, senón que permitirá o desenvolvemento de novas zonas industriais, algo que o alcalde considera clave para o futuro económico do municipio.

Expansión industrial e novas oportunidades laborais

O alcalde confirmou que o concello está a traballar na ampliación do polígono industrial, un proxecto que atraerá novas empresas á zona. De feito, xa existen intereses de compañías locais e externas para establecerse na Estrada, atraídas polas melloras nas infraestruturas e polo acceso directo á nova G59.

«Se temos unha vila ben comunicada e dotada de servizos, debemos garantir traballo e oportunidades para que os nosos veciños poidan vivir e medrar aquí», comentou Louzao, quen tamén destacou que moitas empresas motoras atraen outras auxiliares, xerando así un efecto multiplicador no emprego.

60 novas vivendas de protección oficial

Outro dos proxectos destacados na entrevista foi a construción de 60 vivendas de protección oficial, un proxecto no que Louzao está traballando en colaboración co Instituto Galego de Vivenda e Solo (IGVS). As vivendas, que se construiran nun solo público xa dispoñible, teñen como obxectivo atraer novas familias ao concello e garantir acceso á vivenda a prezos asequibles para aqueles con menos recursos.

«Queremos que a xente poida formar unha familia e establecerse na Estrada sen preocuparse por non atopar unha vivenda accesible», asegurou o alcalde.

Atención ao rural: melloras en comunicacións e conectividade

Louzao tamén destacou o seu compromiso co rural, subliñando que o concello está a traballar na mellora das vías de comunicación nas súas 51 parroquias. Ademais, está a loitar por mellorar a conectividade a nivel de internet e telefonía, un aspecto esencial para que o rural poida manterse competitivo e ben comunicado.

O alcalde introduciu a figura do «alcalde de barrio», un enlace que conectará directamente coas comunidades rurais para identificar e priorizar as súas necesidades. Este representante veciñal será clave para resolver problemas locais e mellorar o día a día da poboación rural.

Un concello deportivo e cultural

No ámbito deportivo, Louzao afirmou que máis de 1.000 persoas participan nas escolas deportivas municipais, unha oferta ampla que inclúe todo tipo de deportes. A nivel cultural, destacou as apostas en música tradicional, teatro e concertos que levan a cabo tanto no casco urbano como no rural, a través de programacións específicas que buscan levar a cultura a todos os recunchos do concello.

O mellor centro de saúde de España

No apartado de saúde, o alcalde lembrou con orgullo que o centro de saúde da Estrada foi recoñecido como o mellor de España, grazas á calidade da súa atención primaria. Louzao tamén mencionou que o concello conta con tres centros de saúde rurais adicionais, garantindo así a proximidade dos servizos sanitarios para toda a poboación.

«Temos que valorar o que temos e seguir loitando por mellorar, sempre escoitando as demandas da veciñanza», dixo o alcalde.

Aposta pola educación e a formación profesional

Outro dos fitos importantes deste inicio de mandato foi a apertura de novos talleres de formación profesional na industria da madeira. Grazas á colaboración coa Consellería de Educación, o concello conta agora coas mellores instalacións para formar aos futuros profesionais do sector, tanto a nivel local como internacional.

Balance dos cinco meses como alcalde

Ao facer un balance dos seus primeiros cinco meses á fronte do concello, Louzao destacou o traballo en equipo como o factor clave para o éxito do goberno municipal. Asegurou que o equipo que lidera está «ben engrasado» e que a súa prioridade é atender tanto ás grandes cuestións como ás pequenas demandas cotiás da veciñanza.

«A palabra que define estes cinco meses é equipo. Non funciona o personalismo, necesitamos un equipo forte para avanzar», subliñou Louzao.

A entrevista completa, no seguinte enlace.