Desconvocada a folga de autobuses urbanos en Santiago

Imaxe: X

A folga de autobuses urbanos prevista para este venres en Santiago foi desconvocada tras un preacordo entre a concesionaria Monbus e os traballadores, representados pola CIG. O pacto, selado este xoves pola mañá, garante a equiparación das condicións laborais entre os empregados de Aulusa e Tralusa, as dúas empresas que prestan o servizo na cidade.

O acordo acadouse nunha reunión mediada polo Consello Galego de Relacións Laborais, onde a concesionaria aceptou todas as reivindicacións do persoal. Unha das melloras máis significativas é a creación dun cuadrante único para ambas empresas, o que permitirá unha maior estabilidade nos turnos. Ata agora, os traballadores de Aulusa exercían como correturnos sen previsión horaria e sen opción a acceder a postos fixos en Tralusa. Co novo sistema, só os empregados con menos antigüidade asumirán esa función, e por un máximo de dous anos.

A ratificación do preacordo en asemblea permitirá anular definitivamente a folga indefinida que estaba prevista para abril, así como o paro que ía ter lugar o venres 14, xa suspendido tras o inicio das negociacións. Nos últimos días, os traballadores protagonizaron concentracións na Praza de Galicia e fronte á estación intermodal, conseguindo finalmente un acordo que pon fin ao conflito.