A Fundación Granell acolle a exposición que transforma en esculturas o novo disco de Fillas de Cassandra

O dúo vigués Fillas de Cassandra leva a portada do seu novo disco ao espazo museístico cunha proposta innovadora que mestura música, escultura e experiencia sensorial. A instalación ‘TERTÚLIA: doce cancións, doce cadeiras’ poderá visitarse este martes 7 e mércores 8 de abril na Fundación Granell, e posteriormente os días 10 e 11 en Madrid, no espazo Infinito Delicias.

A mostra transforma o concepto de portada nunha experiencia inmersiva composta por doce cadeiras dispostas en círculo, cada unha representando unha das cancións do álbum Tertúlia, que se publicará o vindeiro 24 de abril. A disposición circular invita ao encontro e ao diálogo, convertendo o espazo expositivo nunha sorte de praza contemporánea onde a palabra ocupa o centro.

A proposta xorde da colaboración co colectivo artístico As dúas e punto, que traduce as cancións en pezas escultóricas únicas. As cadeiras, lonxe de seren funcionais, propoñen unha interacción crítica: algunhas acollen, outras incomodan, obrigando o público a posicionarse fronte á obra.

Cada peza funciona como unha “partitura tridimensional” e conta cun punto de escoita individual que permite preescoitar os temas antes do lanzamento oficial do disco. Entre elas atopamos desde estruturas inspiradas nas cadeiras de praia tradicionais ata “anti-cadeiras” cubertas de pinchos, pasando por pezas orgánicas, refuxios simbólicos ou xogos de materiais como metacrilato, musgo ou poliuretano.

A elección da cadeira como elemento central conecta coa tradición das tertulias populares, evocando as mulleres que sacaban o asento á rúa para compartir historias e saberes. Así, Tertulia preséntase tamén como un xesto político que reivindica a escoita, o encontro e a construción colectiva de sentido.

O novo traballo de Fillas de Cassandra, producido xunto a Çantamarta, afonda na fusión entre electrónica e raíz, incorporando colaboracións como as de Abraham Cupeiro, Ede, Pipiolas e Zetak. O disco estrutúrase en doce cancións que funcionan como espazo de confianza e diálogo fronte á fragmentación social.

A súa presentación ao vivo terá lugar o 9 de maio no Recinto Feiral de Pontevedra.