A maxia enche Santiago de solidariedade coa IV Gala Benéfica de Maxia a favor de ASANOG

• O Auditorio Abanca acollerá o domingo 23 de novembro, ás 12:00 horas, un espectáculo de maxia solidaria a beneficio da infancia e adolescencia con cancro en Galicia.

Santiago de Compostela, 18 de novembro de 2025. Este domingo 23 de novembro terá lugar a IV Gala Benéfica de Maxia a favor de ASANOG (Asociación de Cáncer Infantil y Juvenil de Galicia), unha cita solidaria xa consolidada no calendario compostelán. Un grupo de magos e magas profesionais actuará de forma totalmente altruísta, ofrecendo un espectáculo único pensado para público de todas as idades.

A gala celebrarase ás 12:00 horas no Auditorio Abanca de Santiago de Compostela, converténdose nun punto de encontro para as familias e para todas aquelas persoas que queiran desfrutar dunha mañá chea de ilusión ao tempo que colaboran cunha causa imprescindible. As entradas teñen un prezo de 10€ para persoas adultas e 5€ para menores de 12 anos, e xa están dispoñibles a través de Ataquilla.

A recaudación íntegra destinarase a apoiar o labor de ASANOG coas familias que están a facer fronte ao cancro infantil e xuvenil en Galicia, permitindo á asociación continuar ofrecendo acompañamento psicolóxico, social, educativo e asistencial nos tres hospitais de referencia da comunidade e na súa sede en Santiago.

A gala conta coa colaboración de A Fundación, ademais dos propios magos que fan posible o evento ano tras ano. Desde hoxe, martes 18 de novembro, o cartel oficial poderá verse nas principais marquesinas da cidade, animando á cidadanía a participar nesta xornada máxica e solidaria.

Máis información sobre ASANOG

A Asociación de Cáncer Infantil y Juvenil de Galicia (ASANOG) é unha entidade sn ánimo de lucro que axuda a toda a infancia e adolescencia oncolóxica de Galicia, constituida no ano 2012 e de utilidade pública desde o 2019. O seu obxectivo principal é contribuir ao mellor estado da infancia con cancro e as súas familias donde a única condición é ter un menor diagnosticado cunha enfermidade onco-hematolóxica.

Desde ASANOG proporciónase información e asesoramento a todo aquel que o solicite, ademáis de prestar o tipo de axuda segundo as necesidades de cada familia: apoio psicolóxico e social, apoio económico, apoio educativo, piso de acollida na cidade da Coruña para familias desplazadas alí.

ASANOG ponse á disposición dos medios para ofrecer declaracións tanto desde a asociación como por parte dalgúns dos magos participantes.