A Pascua de Padrón mantén o seu carácter tradicional cun ambicioso programa para todos os públicos

• A Feira Cabalar e a exposición de maquinaría agrícola abren unhas festas na que estarán presentes as mellores orquestras de Galicia
• “Apostamos pola música do país e por amosar o talento comarcal tanto no pregón como no cartel das festas”, asegura o alcalde, Anxo Arca
• Chus Campos resalta unha programación feita a medida da veciñanza, con espazos para a mocidade, co espectáculo de Ricky Galende e con presenza feminina e das agrupacións locais
• Mateo Pardal, ‘Lestrovense’, é o autor do cartel das festas, das que será pregoeira a triatleta padronesa Martina López Gestal

Padrón. 1-4-2025.- As Festas da Pascua comezarán o vindeiro venres 11 de abril mantendo o seu carácter tradicional e cun ambicioso programa para todos os públicos e que consolida a Padrón como destino de referencia entre as principais festas de Galicia. Ao longo de dúas semanas Padrón acollerá as principais orquestras galegas, concertos, eventos deportivos, a tradicional Feira Cabalar e daralle protagonismo a música feminina e ao talento comarcal.

O alcalde, Anxo Arca, destacou esta mañá na presentación das Festas de Pascua que o Concello de Padrón “fixo unha aposta forte pola música do país e espectáculos que farán de cada noite un recordo imborrable”. Avanzou que as festas comezarán xa o venres 11 coa apertura das atraccións do Campo do Souto.

Anxo Arca resaltou que, este ano, “queremos poñer en valor o talento da nosa comarca e avanzar nunha maior presenza das mulleres, porque a igualdade debe impregnar todos os eidos”. Neste senso sinalou que o cartel foi deseñado polo artista dodrense Mateo Pardal, que asina como Lestrovense, e que a triatleta local Martina López Gestal será a pregoeira das Festas da Pascua. O alcalde tamén sinalou que a tiktoker de Valga Sara Seco será a presentadora do pregón.

Pola súa banda, a concelleira e Turismo e Festexos, Chus Campos, destacou que o concerto da Banda da Loba, grupo galego integrado por cinco mulleres que fusionan pop, blues, folk e rock, será outro dos grandes atractivos destas festas en Padrón, xunto co espectáculo Renovatión Experience de Ricky Galende. “Este ano na Pascua volveremos contar coas mellores orquestras de Galicia como Panorama, Los Satélites, París de Noia ou Olympus. Non faltarán as formacións locais Charleston, Unión y Fuerza, Atenas e dúo Máster e as agrupacións folclóricas do municipio”.

Chus Campos resaltou que este ano se tiveron en conta as propostas feitas pola veciñanza para elaborar o programa. “Queremos poñer en valor a creatividade e a enerxía das novas xeracións, con espazos para a súa participación, como a Tarde de RAP o sábado de Pascua, ou a Noite Xove do domingo de Pascua co espectáculo de Ricky Galende.

Cartel de Lestrovense

Esta aposta pola xuventude amosase xa na autoría do cartel das festas da Pascua, obra do artista Lestrovense, o mozo de Dodro Mateo Pardal, que quixo reflexar “o carácter tradicional da a través do folclore e do baile galego, representado por tres bailarinas, unha delas vista desde unha perspectiva aérea na parte superior dereita”.

A combinación de cores primarias como o amarelo, o azul e o vermello, xunto co negro “será un forte contraste que simboliza a dualidade da festa”, asegura Mateo Pardal. “Por unha parte evoca a ledicia e a luminosidade da feira, coas súas luces e focos das atraccións, e, por outra, suxire as sombras danzantes das persoas na noite, nun xogo de luces e contrastes que reforza a atmosfera dinámica e festiva do evento”, asegura o artista dodrense.
Feira Cabalar

A Feira Cabalar, que se celebra o domingo 20, é outro dos atractivos principais das Festas e Pascua. Criadores, tratantes e afeccionados de toda Galicia achegaranse ata a tradicional feira, que se celebra no Campo da Barca.

A partir das 10.00 celebrarase o tradicional concurso morfolóxico, que nalgunhas categorías é puntuable para a Copa Galicia. Este ano introdúcese como novidade o concurso de cabalos percheróns, bretóns e hispano-bretóns, e vólvese celebrar o concurso de ponis, no que se dará relevancia a que os presentadores dos animais sexan menores de idade. O concurso de eguas e cabalos e pura raza árabe está previsto que comece sobre o mediodía.

Organizado pola Asociación de Pura Raza Cabalo Galego en colaboración co Concello, a Feira Cabalar e o concurso rematará cun espectáculo de doma.

A programación deportiva, con campionatos de tenis, xadrez e fútbol base, xunto co Torneo de Chave de Pascua completan esta ampla programación das Festas de Pascua 2025.