A princesa Leonor recibirá a Medalla de Ouro de Galicia o 14 de xullo en Santiago

A princesa de Asturias, Leonor de Borbón, será distinguida coa Medalla de Ouro de Galicia nun acto institucional que se celebrará o vindeiro luns, 14 de xullo, en Santiago de Compostela. Así o confirmou o presidente da Xunta, Alfonso Rueda, tras a reunión do Consello do Goberno galego, que xa anunciara a concesión do galardón a comezos de xuño.

O presidente do Goberno galego, Alfonso Rueda, defendeu esta decisión apelando ao vínculo da Casa Real con Galicia e á presenza da princesa na comunidade durante a súa formación militar na Escola Naval de Marín, que culminará o 16 de xullo coa entrega oficial de despachos. Segundo as súas palabras, trátase dun recoñecemento motivado polo “cariño sinxelo” que está “seguro” que “a maioría do pobo galego sente”.

A entrega da Medalla á herdeira da Coroa producirase de maneira separada á cerimonia oficial conxunta, prevista para o día 24 de xullo, na véspera do Día de Galicia, onde se homenaxeará ao resto das persoas e entidades galardoadas.

Leonor de Borbón pasará así a formar parte do listado de figuras distinguidas coa máxima condecoración da Xunta, entre as que se atopa tamén o seu avó, o rei emérito Juan Carlos I, galardoado no ano 1985.

As Medallas de Ouro de Galicia constitúen a máxima distinción outorgada polo Goberno galego a persoas, entidades ou colectivos polos seus méritos ao servizo da sociedade galega en calquera ámbito.

Cómpre lembrar que, ata o ano 2014, a entrega das Medallas de Ouro de Galicia realizábase tradicionalmente o 25 de xullo. Porén, ese ano adiantouse a data como homenaxe ás vítimas do accidente ferroviario de Angrois, ocorrido un ano antes. Desde entón, esta data mantívose salvo excepcións puntuais, como en 2021, cando o acto contou coa presenza do rei Felipe VI.