Convocadas tres xornadas de folga no sector ferroviario os días 9, 10 e 11 de febreiro

• O sector Ferroviario de FSC-CCOO chama a tres xornadas de paro no Grupo Renfe, ás que se suman os operadores privados Iryo e Ouigo, así como Serveo Servicios a bordo

28-01-2026.- Os graves accidentes ferroviarios ocorridos recentemente, con resultado de vítimas mortais e persoas feridas, xeraron unha profunda preocupación entre o persoal das empresas ferroviarias e volven poñer de manifesto a existencia de problemas estruturais no sector ferroviario, que CCOO vén denunciando desde hai tempo.

Para a organización, a conflitividade ten causas claras, entre as que destacan:

A falta de persoal en todos os ámbitos do Grupo Renfe, que causa sobrecargas de traballo continuadas e limita a capacidade de resposta ante incidencias de especial complexidade.

A externalización cara a empresas privadas de actividades propias do ferrocarril que deberían realizarse con persoal do Grupo Renfe, con formación adecuada e unha planificación coherente co volume de actividade existente.

Os problemas de coordinación en situacións de emerxencia, agravados pola insuficiencia de recursos humanos e a fragmentación de tarefas esenciais que xeran tensións operativas, inseguridade na toma de decisións e dificultades para garantir unha resposta adecuada ante situacións complexas.

Os ataques á profesionalidade e aos dereitos das persoas traballadoras, como o demostra a filtración de audios internos, entre eles os procedentes do Centro de Xestión de Operacións. Estes feitos supoñen un atentado contra o cadro de persoal, deterioran o clima laboral e comprometen a confianza necesaria para unha xestión responsable e eficaz do sistema ferroviario.

Desde CCOO esiximos solucións reais, inmediatas e verificables. O noso obxectivo é defender as condicións de traballo, a saúde e a integridade do persoal, así como garantir un ferrocarril público con medios humanos suficientes e unha xestión directa e responsable das súas actividades esenciais.

Así mesmo, queremos deixar claro que este sindicato non persegue solucións parciais nin limitadas a colectivos concretos. CCOO esixirá un acordo global que implique a todos os colectivos do ferrocarril, porque os problemas que atravesa o sistema ferroviario son transversais e afectan ao conxunto do persoal, desde a operación ata o mantemento, a circulación, a atención a bordo e o resto de actividades que sosteñen o servizo público.

Do mesmo xeito, consideramos imprescindible avanzar na xestión preventiva dos riscos derivados de fenómenos ambientais e situacións extremas. Neste sentido, no ámbito de Catalunya, CCOO acordou un protocolo específico de xestión destes riscos. Consideramos necesario que ese protocolo sexa desenvolvido e extrapolado ao conxunto do territorio para reforzar a protección das persoas traballadoras e a adecuada prestación do servizo ante este tipo de situacións.

Desde CCOO levamos moito tempo defendendo unha idea moi clara: o mantemento ferroviario debe ser público, con persoal propio, con cadros de persoal suficientes e cos máximos estándares de seguridade e calidade. E cando falamos de mantemento ferroviario referímonos ao conxunto do sistema: da infraestrutura ferroviaria, no caso de Adif, e do material rodante no Grupo Renfe.

Neste marco, convocouse para o próximo 3 de febreiro unha concentración diante do Ministerio de Transportes, xunta o resto de organizacións sindicais que integran os Comités Xerais de Empresa do Grupo Renfe e Adif, como primeiro acto unitario de todo o sector ferroviario para esixir responsabilidades e a adopción de medidas concretas.

En definitiva, paramos os días 9, 10 e 11 de febreiro en defensa dunhas condicións de traballo dignas e dun ferrocarril público á altura das necesidades da cidadanía.