Evacuado un operario tras sufrir unha caída desde gran altura nun polígono de Padrón

Arquivo

Un traballador tivo que ser evacuado este xoves en helicóptero despois de sufrir unha caída mentres realizaba labores nunha nave do polígono de Picusa, en Padrón.

Segundo informou o 112 Galicia, o aviso produciuse arredor das 10:00 horas, cando un particular alertou de que o operario se precipitara desde unha altura considerable.

Ata o lugar desprazáronse efectivos de Urxencias Sanitarias de Galicia-061, ademais da Garda Civil, o GES e a Policía Local de Padrón. Unha vez no punto, os equipos de emerxencia confirmaron que o ferido se atopaba consciente.

Dada a situación, procedeuse á súa evacuación nun helicóptero medicalizado con base en Santiago para o seu traslado a un centro hospitalario.