Un home ferido tras caerlle enriba un silo en Trazo

Arquivo

Un varón resultou ferido este mediodía no concello de Trazo tras sufrir un accidente laboral mentres realizaba tarefas de limpeza nunha nave situada en Aldea Rosende, na parroquia de Campo.

Segundo informou o 112 Galicia, o suceso produciuse arredor das 13:45 horas, momento no que o Servizo de Urxencias Sanitarias de Galicia-061 comunicou a mobilización dun helicóptero medicalizado con base en Santiago para atender ao ferido, ao que lle caera un silo enriba.

Ata o lugar desprazáronse tamén efectivos da Garda Civil e membros da Agrupación de Voluntarios de Protección Civil de Trazo. Unha vez estabilizado, o home foi evacuado na aeronave medicalizada a un centro hospitalario.

Polo momento descoñécese a gravidade exacta das lesións do afectado.