Los Lobos chegan a Santiago para un concerto histórico na Sala Capitol

Santiago de Compostela prepárase para recibir a unha das bandas máis lendarias da historia do rock mestizo. Los Lobos xa están en Compostela para ofrecer este mércores 4 de febreiro, ás 20:30 horas, un concerto moi especial na Sala Capitol, unha cita chamada a ser un dos grandes eventos musicais deste comezo de ano.

Nados no leste de Los Ángeles e con 52 anos de traxectoria, Los Lobos chegan cunha carreira monumental ás costas, marcada por un catálogo impresionante e unha influencia que atravesa xeracións e fronteiras. O grupo soubo construír un son propio no cruce de camiños entre xéneros afroamericanos como o blues, o soul, o jazz e o rock and roll, sen esquecer nunca as súas raíces.

A súa música latexa ao ritmo da tradición mexicana e latinoamericana, incorporando estilos como a norteña, a ranchera, o bolero, a cumbia, o son huasteco ou o son jarocho. Esa mestura converte cada concerto nunha experiencia única, onde conviven memoria, identidade e emoción colectiva.

Máis alá dunha banda, Los Lobos son unha verdadeira memoria viva da música latina e estadounidense, un exemplo de resistencia cultural e unha demostración de que a grandeza artística nace do traballo compartido e do respecto polas raíces.

Aínda quedan entradas anticipadas dispoñibles na tenda, por 34 € + 1 € de gastos de xestión.

Un concertazo imprescindible para os amantes da boa música e para quen queira vivir unha noite histórica en Santiago de Compostela.