Lucía Calvo de la Uz deslía 16 anos de parálise: «Teo xa ten folla de ruta e volveu avanzar»

Teo (A Coruña), 29 de agosto de 2025.- O Concello de Teo vén de celebrar o Pleno Extraordinario que marca o Regulamento Orgánico Municipal (ROM) do Concello de Teo, logo de 15 anos sen convocarse. Nesta sesión, a cal foi demandada polo grupo socialista e na que non estivo precisamente a súa portavoz, valorouse o balance das actuacións levadas a cabo nos dous primeiros anos de goberno do actual Executivo local, o cal é moi positivo, pois se resume “nunha folla de ruta clara e a prol do crecemento e desenvolvemento do municipio”, segundo palabras da alcaldesa, Lucía Calvo de la Uz.

Durante a súa intervención, a rexedora municipal explicou que este Pleno Extraordinario, o cal se incluíu a través dunha modificación do ROM, só se convocou nos últimos anos en tres ocasións: o 26 de febreiro de 2008, o 15 de abril de 2009 e, finalmente, o 4 de marzo de 2010. Un cambio do que si tiña coñecemento o partido socialista -quen o demandou- pero que sen embargo non convocou durante os seis anos que cogobernou co partido “Son de Teo”, hoxe reconvertido no grupo PXCT. A pesar diso, a rexedora salientou que, a partir de agora, se convocaría de forma anual, tal e como marca a normativa vixente.

Ao longo da súa exposición, Calvo de la Uz reiterou o compromiso do actual Executivo local por paliar os 16 anos de parálise que sufriu o concello en materia de desenvolvemento. Neste senso, destacou a recente aprobación definitiva do polígono industrial que se situará na zona da Ramallosa, logo do “esforzo titánico” do equipo de Urbanismo, e que permitirá crear novos postos de traballo en Teo. Outra prioridade por parte do actual equipo de goberno e que se viu materializado tamén nos últimos meses foi a cesión á Xunta de Galicia dunha parcela de solo urbano consolidado para a construción de vivenda de promoción pública, coa idea de fixar poboación no municipio e rebasar así a barreira dos 20.000 habitantes nun territorio de case 80 quilómetros cadrados e cunha situación xeográfica estratéxica para o seu crecemento.

Do mesmo xeito, xa é unha realidade -en palabras da alcaldesa- o futuro centro de día de Teo, logo de adquirir un inmoble totalmente financiado pola Xunta de Galicia que permitirá atender ás persoas maiores do concello, as cales moitas delas teñen que desprazarse actualmente a municipios veciños para poder desfrutar deste servizo. Así mesmo, reiterou que o inmoble cumple cos requisitos legais para poder adecualo aos servizos que se levarán a cabo no seu interior. Un proxecto, puntualizou Calvo de la Uz, que se suma ao novo centro de saúde da Ramallosa, logo de que o actual executivo fora quen de poñer en orde a cesión dos terreos ao Servizo Galego de Saúde. Feitos e compromisos cumpridos, matizou a alcaldesa, que non tiveron o apoio da Oposición nos diferentes Plenos, sobre todo dos grupos socialista e do bloque galego nacionalista, pero si foron logo obxecto de críticas na prensa.

Ademais, sinalou a rexedora, o compromiso do Goberno teense centrouse, como ben sabe a cidadanía, na mellora das infraestruturas municipais, tanto viarias como centros educativos, pavillóns, casas comúns, etc. Obras, salientou, máis que necesarias ante a falta de mantemento dos últimos anos que, incluso, poñían en risco o desenvolvemento de actividades para a poboación.

Nestes dous primeiros anos de lexislatura do actual equipo de goberno, tamén foi importante a posta en valor e visibilización dos recursos e patrimonio de Teo. Neste senso, ademais de reparacións e restauracións de monumentos, tamén se editou a primeira guía que recolle o patrimonio natural, arquitectónico e cultural do municipio. Así mesmo, apostouse pola publicación dun novo libro dos Bolechas para que os máis cativos poidesen descubrir os lugares máis emblemáticos das 13 parroquias de Teo.

No ámbito cultural, adecuouse o auditorio municipal para convertelo nun espazo multidisciplinar, onde tivera cabida obras de teatro, espectáculos e exposicións artísiticas. Ampliouse a oferta formativa das escolas municipais culturais e incrementáronse as actividades de lecer para todas as idades. De feito, no ano 2024 presentouse a primeira campaña turística planificada e orzamentada para todo o ano, estratexia que se repetiu no presente ano cunha alta participación entre a cidadanía teense e dos arredores. Unha aposta decidida e comprometida co turismo e coa cultura, á que se sumou tamén o apoio ao comercio e hostalaría, cunha campaña audiovisual, e aos artesáns na creación dunha asociación propia.

Por último, destacou Calvo de la Uz, e tras solventar numerosos requerimentos con esforzo e traballo por parte dos técnicos municipais, conseguiuse a declaración oficial da Feira Cabalar do San Martiño de Francos como Festa de Interese Turística de Galicia, un logro que permite promocionar aínda máis unha feira de máis de 500 anos de antigüidade.

Ao longo da súa extensa intervención, a rexedora municipal tamén detallou os apoios do Goberno local a sectores como o educativo, deportivo, xuventude, lingua, igualdade, mobilidade e, como non podía faltar, aos servizos sociais.

Finalmente, lembrou que desde a súa chegada á alcaldía, o equipo de goberno foi quen de aprobar anualmente uns orzamentos, detallados e reais, así como poñer en orde os preto de 18 contratos que estaban en precario, sacando xa algunha licitación de importancia como é o caso do asesoramento xurídico, escolas deportivas, rozas de camiños ou servizos na nube; e traballando noutros de gran peso como é o do lixo.