Luis Penido recibirá o título de Campión de Europa en Ascoli (Italia)

Esta próxima fin de semana varios membros do Luis Penido Rally Team viaxan a Ascoli Piceno, en Italia, á Gala da Federación Internacional de Automobilismo (FIA) para recoller o trofeo de Campións do Grupo 5 do Campionato de Europa de Montaña (FIA European Hillclimb Championship).

Tras unha tempada redonda deportivamente, e cun grandísimo esforzo da escudería galega (o Club Deportivo Racing Galicia Sport), o equipo rematou o campionato con 181,5 puntos, acadando o primeiro posto no grupo por diante doutros 25 equipos continentáis.

Este é un feito histórico para o automobilismo galego xa que ningún piloto galego tiña rematado un Campionato de Europa, desta especialidade automobilística, acadando o título do campionato continental. Pleno de podios conseguidos polo equipo nas dez probas nas que competiu, en dez países distintos, e aos mandos tanto do Mini Peniden coma do Renault Clio Cup Evo.

Reseñable tamén o feito de ser o único equipo europeo que se alzou co título acadando tamén unha pegada de carbono neutra derivada de tódalas suas participacións nas distintas probas e campionatos da tempada, con actividades compensatorias como a prantación de centos de árbores autóctonas en diversas zonas verdes de Compostela.