Merelles: “Galicia é agora mesmo referente en turismo musical e cultural en toda España”

Xose Manuel Merelles

• O director de Turismo, Xosé Manuel Merelles, destaca que “Galicia é pioneira no turismo de festivais”, e que a cultura, xunto coa gastronomía e o interior, son clave para o que pode ser “o mellor verán turístico da historia”.
• Galicia enche o verán de música: máis de 120 concertos e 70 festivais impulsados pola Xunta mobilizarán a 800 artistas

Galicia prepárase para vivir un verán sen precedentes no eido turístico e cultural. O director de Turismo de Galicia, Xosé Manuel Merelles, afirmou en Radio Líder Santiago que a nosa comunidade contará con máis de 120 concertos e festivais durante os próximos meses, repartidos por 70 localizacións distintas e mobilizando a máis de 800 artistas nacionais e internacionais.

“Estamos a falar dun fenómeno que se consolidou nos últimos anos e que agora podemos chamar con orgullo turismo de festivais made in Galicia”, explicou Merelles. Este verán, escenarios como o Monte do Gozo acollerán citas de primeiro nivel como a pasada fin de semana con Maná e David Guetta, pero tamén hai espazo para eventos como o Resurrection Fest en Viveiro, o Sinsal na illa de San Simón ou o PortAmérica, entre moitos outros.

Segundo os datos da Xunta, desde 2022 máis de 2,5 millóns de persoas participaron en eventos patrocinados por Turismo de Galicia, un impulso que non só dinamiza a oferta cultural, senón tamén a ocupación hoteleira, a restauración e o comercio local: “Estamos a conseguir que o turismo sexa sostido ao longo de todo o ano”, subliñou Merelles.

Merelles tamén destacou a aposta polo turismo de interior, sinalando que “hai un gusto crecente por descubrir as aldeas e o patrimonio menos coñecido de Galicia”. Esta liña de promoción tivo especial protagonismo en FITUR, con iniciativas centradas en destacar a cultura, natureza e hospitalidade do interior galego.

“Galicia non é só costa. Hai moito interior por descubrir e celebrar, con festas, tradicións e paisaxes únicas”, afirmou.

Ademáis, Merelles anunciou que “este pode ser o mellor verán da historia do turismo galego”, cunha previsión de ocupación entre o 75% e o 90%.

Gastronomía e enoturismo: sabores que atraen visitantes

Outro dos piares fundamentais é a gastronomía. “Agora mesmo é a segunda motivación para visitar Galicia, despois da natureza”, dixo Merelles. Eventos como o Show Cooking Sete Cidades, Sete Sabores ou a súa versión internacional en O Porto poñen en valor a riqueza culinaria da comunidade.

E o enoturismo non se queda atrás. Con 24 millóns de euros investidos a través dos fondos Next Generation, a Xunta está a consolidar este produto turístico. “Temos cinco denominacións de orixe que se están a converter en destinos por si mesmos”, asegurou.

O Camiño de Santiago segue tamén en forma: “Está máis vivo ca nunca. Cada vez hai máis estranxeiros e máis xente que repite. Non é só unha cuestión de cifras, é unha experiencia vital que Galicia ofrece ao mundo”, declarou.

Sobre a posible implantación dunha taxa turística, indicou que Santiago e A Coruña están traballando nos seus plans, pero pediu “responsabilidade, diálogo e que se utilice para mellorar a xestión turística, non como un imposto máis”.

En relación coa futura taxa turística que pretenden aplicar algúns municipios galegos como Santiago de Compostela ou A Coruña, Merelles insistiu na necesidade de actuar con sentido común e planificación. “O que fixemos foi poñer á disposición dos concellos a posibilidade de establecer este imposto”, explicou, matizando que a súa implantación debe facerse “con diálogo coa cidadanía e co sector hostaleiro, e cun reparto xusto da recadación”.

O director de Turismo de Galicia advertiu que calquera medida mal xestionada podería afectar á consolidación do destino Galicia, polo que pediu “responsabilidade aos concellos para que non sexa un imposto máis, senón un instrumento útil para mellorar a oferta turística, a sostibilidade e a xestión dos recursos no territorio”.