Nace en Santiago ‘Devire Sessions’, unha viaxe musical íntima e colaborativa que percorrerá Galicia

 Zeltia Acuña en Radio Líder Santiago | Arquivo

Inspirado na atmosfera acolledora dos Tiny Desk Concerts, nace Devire Sessions, un novo proxecto musical que busca conectar artistas e público nun ambiente íntimo, afastado da masificación dos grandes escenarios. A iniciativa, impulsada pola artista Zeltia Irevire e outras creadoras convidadas, combinará concertos acústicos con espazos de conversa e interacción, como se de unha reunión entre amigos no salón da casa se tratase.

A viaxe comezará o luns 28 de abril no Centro Xove de Creación Cultural de Santiago de Compostela, e percorrerá distintas localidades galegas cun formato itinerante e colaborativo. Cada sesión non só destacará a música en vivo, senón que integrará produtos e oficios locais na súa escenografía, poñendo en valor a riqueza cultural e creativa de Galicia.

Un proxecto feito en comunidade

Devire Sessions é posible grazas á colaboración de varios colectivos e profesionais: Fenda Studio Creativo (dirección e produción creativa), Golondrina Studio (codirección audiovisual), Dani «Pabuko» (son) e a propia Zeltia Acuña, directora e alma do proxecto.

Esta proposta invita a disfrutar da música doutro xeito: máis próximo, máis humano e sempre en diálogo coa identidade do territorio. Unha oportunidade para escoitar, sentir e conversar, celebrando a arte como vehículo de conexión.

Máis información nas redes sociais de Devire Sessions e das artistas participantes.