O 5º Festival de Acordeóns “Música no Camiño” celebrarase o 14 de marzo na Estrada

O Concello da Estrada acolleu esta mañá a presentación oficial da quinta edición do Festival de Acordeóns “Música no Camiño”, unha cita cultural xa consolidada que cada ano reúne a centos de espectadores arredor da música e do acordeón.

No acto participaron o alcalde da Estrada, Gonzalo Louzao, e o deputado provincial Jorge Cubela, que estiveron acompañados por integrantes da formación musical Os Lóstregos. Durante a presentación, destacouse a importancia deste festival como dinamizador cultural e como escaparate do talento musical vinculado a un instrumento con fonda tradición en Galicia.

O festival celebrarase o vindeiro sábado 14 de marzo no Teatro Principal da Estrada, con dous pases programados ás 17.30 e ás 20.30 horas. O prezo da entrada será de 10 euros e xa poden recollerse no Departamento de Cultura do Concello da Estrada, en ACAE, Mesón A Estrada e Confitería Mimela. A organización informa de que non haberá venda na billeiteira o propio día do evento.

O cartel desta quinta edición está composto polo Grupo de Acordeóns Acorde Son do Verdugo, a Orquesta de Acordeones Isidro Larrañaga, Os Lóstregos —coa súa cantante Marietta—, o acordeonista portugués Antonio Charrinho e contará ademais coa colaboración especial da Asociación Cultural Música Tradicional de Barbude.

A presentación do evento correrá a cargo de Noelia Rodríguez, que será a encargada de conducir unha xornada que promete variedade de estilos, talento e unha firme aposta pola posta en valor da música tradicional e contemporánea interpretada con acordeón.

Con esta nova edición, “Música no Camiño” reafírmase como unha das citas culturais máis destacadas do calendario estradense, consolidando o seu crecemento e a súa capacidade de convocatoria ano tras ano.