O Banquete de Conxo une reivindicación e natureza do 23 ao 25 de maio

A Festa do Banquete é “unha cita participativa, tanto para veciñanza como para visitantes que queren gozar dunha fin de semana de celebración, mais que tamén queren honrar un dos episodios da nosa historia como foi aquel Banquete de 1856 e o espírito de fraternidade e de igualdade que simboliza”, subliñou a concelleira de Festas, que fixo fincapé nese carácter participativo dunha festa que arranca “precisamente cunha actividade comunitaria e en grupo como son  os cantos de taberna do venres”.

Comezarán ás 21.00 h e participarán os grupos Can de ghaiteiro, Colexiata de Sar, Esfolladores, Muiñeiros do Sarela, Recandea e Sapamamas. Os cantos terán lugar nos bares A da Chara, Caimán, Mallos, Marlo  e a cantina da  comisión, nunha actividade coordinada por Muiñeiros do Sarela.

O sábado, ás 11:30h será o tempo dunha actividade “que é xa un clásico da Festa do Banquete”, como é o paseo literario a cargo de Henrique Alvarellos. Leva por título ‘As voces do Bosque’, terá unha duración de 90 minutos e é preciso inscribirse en rutabanquete@santiagodecompostela.gal. Percorrerá diferentes voces que protagonizaron fitos significativos no Bosque de Conxo desde a Idade Media ata o exilio republicano. A xornada do sábado continuará con toda a actividade na praza Aurelio Aguire e xa o domingo a xornada recrea, como vén sendo habitual, o que fora aquel histórico Banquete de hai 169 anos.

Comeza co desfile de estudantes e artesás que sae da praza do Toural ata Conxo, ás 11h, e que estará guiado polos Quinquilláns, “para o que animamos a todas as persoas a participar ataviadas coa vestimenta que recrea a época de 1856”, indicou Lueiro. E mentres o desfile vai chegando, na praza Aurelio Aguirre, poderase ir desfrutando do concerto Let’s folk do grupo Suzukiños (formado por músicos da escola En Clave Método Suzuki).

A continuación, ás 13:45h, terá lugar o Pregón da Festa do Banquete que correrá a cargo de representantes das dúas parroquias convidadas: Xosé Neira, por parte de Aríns; e Manuel Cespón, de Figueiras.  Lembrou a concelleira que “nesta festa é onde máis protagonismo se lles dá ás parroquias convidadas, que son antigas parroquias ou barrios que formaron parte do antigo concello de Conxo.

A partir das 15 horas baixarase á zona do banquete para o xantar e romaría popular, con brindes da veciñanza, que continuará co serán de fraternidade, con foliadade música tradicional con Os Fondaos do Pífaro, Devagarinho de Villestro, Asociación de Música e Baile tradicional de Conxo, Grupo de Cantos de Taberna Contedores de Recandea e Muiñeiros do Sarela. E ás 18:30h despedirase a romaría con convite á seguinte edición cun pregón de peche a cargo da escritora, e actualmente veciña de Aríns, Teresa Moure.

Actividades na praza de Aurelio Aguirre

A praza de Aurelio Aguirre será o outro centro neurálxico da Festa do Banquete de Conxo, con numerosas actividades paralelas que, tal e como explicou a tenenta de alcaldesa, «teñen como obxectivo chegar a un público máis diverso, enriquecer a celebración e consolidala como unha cita imprescindible no calendario festivo de Santiago”.

María Rozas deu conta desas propostas, que se desenvolverán tanto no sábado 24 como no domingo 25, impulsadas desde os departamentos de Comercio, Xuventude e Centros Socioculturais. Unha delas, que xa se celebrou en anos anteriores, é o Mercado do Libro, que este ano contará con 11 expositores e con numerosas actividades paralelas, con máis dunha ducia de presentacións ou sinaturas de libros. Pola praza de Aurelio Aguirre pasarán, entre outros, Juan Baquero para asinar o seu libro Lola Feroz; Isabel Portela que presentará a súa obra Ante dos Mundos; ou Hércules Edicións presentando títulos que son moi coñecidos por todos os nenos e nenas, como “Mortiña” ou “Bufiño e Brunilda”. Ademais, volverá tamén a mostra de artesanía, desta vez coa participación dunha ceramista, un ferreiro e un artesán de instrumentos tradicionais, que non só exhibirán os seus produtos senón que tamén estarán traballando ao vivo.

Público infantil e xuvenil

A programación do Banquete de Conxo tamén inclúe moitas propostas para o público infantil. Así, ao longo do sábado pasarán pola praza de Aurelio Aguirre Títeres Babaluva, coa sua Feira das Sementes e Charlatán Rodríguez; e no domingo están previstas as actuacións do Mago Teto e de Peter Punk, ademais das actividades que se trasladarán á zona da carballeira, como unha mostra de xogos tradicionais ou un espectáculo dos Catropés.

En canto á mocidade, para ela están especialmente dirixidas dúas propostas: a sesión vermú do sábado cun cartel que nace do Centro Xove da Almáciga e do que fan parte Patrick e Ginko Bilova; e a Festa da poesía, na noite do sábado. O evento estará conducido por Claudia Pino, e contará coa participación de Clara do Roxo, Francesca da Silva e Iris Abril; e coa música de Miguel Bouzó, Leticia Rey e Xeva.

No apartado musical, a programación inclúe a actividade denominada “Canto Fraterno”, na que participarán pandereteiras de Marrozos e de Sar; e o concerto de Coros na escalinata do Psiquiátrico, coa participación do Coro de Habaneras Rocha Forte, Coro Coto da Nai de Aríns, Coro Crecente, Coro Amigos do Castiñeiriño, Coral da Pontepedriña, ou o Orfeón Tradicional da Colexiata de Sar.

Tren do Banquete de Conxo 

Un ano máis contarase co Tren do Banquete de Conxo; un percorrido especial gratuíto do tren turístico, decorado para a ocasión. Haberá traslados de balde entre a Alameda, no centro da cidade, e o barrio de Conxo. (Prioridade para familias con nenas/os, persoas con mobilidade reducida e persoas vestidas de época).

María Rozas reiterou que o obxectivo da programación “é que a Festa do Banquete sexa unha festa para toda a veciñanza, sen esquecer as súas orixes reivindicativas e de recuperación da memoria, e poñendo en valor o patrimonio natural de Compostela, demostrando que podemos conservalo e defendelo ao tempo que o desfrutamos”.

CENTENARIO DA ANEXIÓN DO CONCELLO DE CONXO

A Festa do Banquete non é a única celebración que terá lugar en Conxo no mes de maio. A concelleira de Festas aproveitou para lembrar que mañá se celebrará o acto central de conmemoración do centenario da adhesión do Concello de Conxo ao de Santiago.

Deste xeito, a corporación e a veciñanza de Conxo sairán en comitiva ás 18.00 h da praza do Obradoiro, cunha parada na praza de Vigo, simbolizando o lugar de nacemento de Rosalía de Castro, a veciña máis universal do antigo Concello de Conxo, onde se fará unha lectura de poemas a cargo de alumnado do CEIP Quiroga Palacios.

Ás 19:30 está prevista a chegada ao claustro do antiguo convento mercedario de Conxo para a celebración do pleno simbólico, con intervencións da alcaldesa; dos e das portavoces dos grupos municipais; de Juan Lema Rodicio, presidente da Real Academia das Ciencias e bisneto de José Lema Martínez, último alcalde de Conxo; de María Elena Barreiro Seijas, vocal da A.VV. A Xunlla de Laraño; e de José Luciano Villar, tesoureiro da A.VV. Conxo Aberto. Tamén haberá unha actuación do Coro Crecente de Conxo. Sobre as 20:15h, a Banda Municipal de Música porá o broche na praza Aurelio Aguirre.