O BNG esixe explicacións sobre a situación actual de «abandono» de Radio Ordes

O portavoz do Grupo Municipal do BNG, Pablo Vidal Ríos, vén de rexistrar un rogo dirixido ao alcalde no que solicita a convocatoria urxente do Consello da Emisora Municipal para abordar a situación actual de Radio Ordes. A iniciativa preséntase ao abeiro do artigo 97 do Real Decreto 2568/1986, que regula o funcionamento das entidades locais.

Desde o Bloque sinalan que levan tempo advertindo dun “progresivo deterioro” da emisora municipal, que —segundo lembran— chegou a contar con programación propia tanto en horario de mañá como de tarde, con contidos de elaboración local e participación da veciñanza.

Co paso dos anos, explican, a actividade reduciuse ata converterse practicamente nun repetidor da Radio Galega, desconectando unicamente para emitir un informativo ás 14:00 horas e para retransmitir os plenos da corporación municipal. Para o BNG, esta situación evidencia unha falta de aposta política por unha ferramenta de comunicación que consideran “patrimonio de todos os veciños e veciñas de Ordes”.

O grupo municipal tamén critica que, malia teren solicitado en varias ocasións a reunión do Consello da Emisora, o alcalde non procedese á súa convocatoria nin dera cumprimento ao establecido no artigo 7 do Regulamento de Organización e Funcionamento da Emisora Municipal de Ordes. Así mesmo, denuncian que non conste ningunha acción concreta por parte do goberno local para reverter a situación.

“Se no pasado e con menos recursos foi posible contar cunha radio que funcionaba, no presente tamén debería selo, sempre que exista un interese real”, sostén o BNG no escrito rexistrado.

A formación nacionalista insta, por tanto, ao rexedor a convocar o Consello da Emisora co obxectivo de informar detalladamente sobre o estado actual do servizo, realizar unha análise da súa situación e estudar posibles medidas para fortalecer, recuperar ou mesmo relanzar Radio Ordes como medio público de proximidade ao servizo da cidadanía.