O compostelán Jorge Mirás expón a súa obra minimalista no Centro Empresarial do Tambre

Exhibirá 24 obras de formas orgánicas e elementos verticais, como bloques de arxila adheridos ao lenzo

A mostra “Inspirar/Expirar” inaugurarase o vindeiro luns ás 20 horas

Santiago de Compostela, 21 de novembro de 2025 (Vía Láctea Comunicación).- A Asociación Área Empresarial do Tambre (AAET) inaugurará o vindeiro luns, 24 de novembro, a exposición “Inspirar/Expirar” do artista Jorge Mirás. O acto celebrarase ás 20:00 horas no Centro Empresarial do Tambre.

A mostra estará composta por 24 obras que compoñen unha exposición de carácter minimalista. Mirás usa formas orgánicas e elementos verticais como uns bloques feitos con arxila que se adhiren ao lenzo. O artista pretende que o espectador se identifique coa obra, explorando a idea de que cada peza se dilúa desde dentro provocando unha enorme inspiración. “O obxecto desta exhibición é causar unha acción-consecuencia, é dicir, que o público experimente un proceso de busca do inevitable” –explica–.

Mirás crea no aberto, como unha forma de coñecemento, o que lle permite rachar cos corsés dos xéneros. A pintura foxe en volumes orgánicos coa forza da arxila, e a escultura disólvese no lenzo cunha nova gramática, onde Inspirar é a pregunta esencial, necesaria e imperceptible, e Expirar a palpitación mesma do ser.

Dese movemento minimalista, de “Inspirar/Expirar” emerxen bloques a xeito de columnas, ou danzas de caixas torácicas que respiran, ou dedos que reptan, pastillas alongadas que buscan novos parámetros para a cor. “A cor fica nas cavidades e xoga coa luz natural neses ocos propiciados polas sombras” –engade–. Con referentes claros en Donald Judd o Dan Flavin, Mirás suxírenos sermos diminutas e entrar nesta experiencia inmersiva sensorial ou, sinxelamente, fluír.

Nado na rúa de Abaixo en Compostela e formado na Escola de Artes e Oficios Mestre Mateo en Santiago, Jorge Mirás (Compostela, 1967) leva toda a súa vida implicado nas artes gráficas, como deseñador ou publicista, pero tamén, durante máis de trinta anos, desde as áreas de maquetación e dixitalización nas redaccións de El Correo Gallego e Galicia Hoxe. Como interiorista e artista plástico está involucrado en varios proxectos aínda en marcha sendo Inspirar/Expirar a súa segunda mostra na capital galega.

A mostra poderase visitar ata o 18 de decembro, en horario de luns a venres de 9:00 a 14:00 horas e de 16:00 a 19:00 horas (recoméndase avisar previamente da visita no teléfono 981 55 28 50).