O corazón de Oroso cambiará de cara coa humanización da Praza Isaac Díaz Pardo

O Concello de Oroso, liderado polo alcalde popular Álex Doval, inicia o 2025 cunha folla de ruta centrada na modernización, o desenvolvemento cultural e a humanización do municipio. Durante unha entrevista recente, Doval detallou os proxectos principais e reflexionou sobre os retos e éxitos que marcaron o 2024, cun claro obxectivo de mellorar a calidade de vida da veciñanza.

O 2025 comezou en Oroso cunha noticia desgarradora: a morte dun mozo de 18 anos, membro de Protección Civil. “Foi un dos momentos máis duros que me tocou vivir como alcalde”, confesou Doval, quen destacou o apoio incondicional do Concello á familia afectada.

A programación de Nadal 2024/25 destacou como unha das máis completas da comarca, cun equilibrio entre tradición e innovación. Eventos como o carrusel, o maratón musical de Virtuosi Violini, e o espectáculo do ilusionista Joshua Kenneth foron grandes atractivos, mentres que actividades tradicionais como a Cabalgata de Reis, o Apalpador e obradoiros de Nadal fomentaron a participación masiva da comunidade. “Foi un Nadal inesquecible, onde combinamos momentos máxicos para grandes e pequenos”, afirmou o alcalde.

Entre os proxectos máis destacados para este ano figura a humanización da Praza Isaac Díaz Pardo, cunha licitación de máis de 705.000 euros. Esta reforma inclúe a renovación das redes de saneamento, a creación dun espazo máis accesible e a restrición do tráfico rodado, promovendo un lugar de encontro para a veciñanza. “A obra será un antes e un despois para Oroso, resolvendo problemas históricos e modernizando un espazo clave”, explicou Doval.

Ademais, outras actuacións no marco do POS 2024 abarcan a mellora da rede viaria en núcleos urbanos e parroquias, cun investimento total de máis de 650.000 euros. Entre as obras xa licitadas destacan a ampliación das beirarrúas da Avenida Compostela e a construción dunha ponte sobre o río Carboeiro en Berdomás. “A aposta por unhas infraestruturas modernas e accesibles é clave para o futuro do municipio”, engadiu o rexedor.

Doutra banda, Oroso é un dos poucos concellos da provincia da Coruña con saldo vexetativo positivo. Esta tendencia impulsa a necesidade de abordar retos como a escaseza de vivenda e a ampliación do polígono industrial para fomentar o desenvolvemento económico. “Temos unha posición privilexiada e queremos aproveitala para seguir crecendo, mantendo a esencia do noso municipio”, apuntou Doval.

A aposta pola cultura continuará marcando o 2025 no municipio. O próximo 17 de xaneiro, o Auditorio Municipal acollerá a proxección de Sen Alma, un filme de Iago Barrado que conta coa participación de Sara Fernández, unha veciña de Oroso, na dirección de son. “Apoyar a cultura local é apoiar a nosa identidade. Convido a todos a asistir a este evento único”, subliñou o alcalde.

Sobre a súa visión e legado, Álex Doval foi claro: “Espero que me recorden como un alcalde próximo, que traballou para humanizar Oroso e para que todos os veciños poidan sentirse orgullosos do seu municipio”. Con proxectos en marcha e unha axenda cargada de iniciativas, Oroso encara o 2025 cunha mestura de tradición, innovación e compromiso colectivo.

Tes a entrevista completa no seguinte enlace.