O Festival de Acordeóns da Estrada busca converterse no mellor de España

• A cuarta edición do evento musical esgota entradas e suma prestixio internacional para a súa edición do próximo sábado 29 de marzo, na Estrada. 

O acordeón está a recuperar o seu espazo na escena musical galega grazas ao Festival de Acordeóns «Música no Camiño», que celebra este ano a súa cuarta edición. Organizado pola Asociación Cultural do Acordeón da Estrada (ACAE), o evento terá lugar o 29 de marzo no Teatro Principal da Estrada, con dúas funcións ás 17:30 e ás 20:30. A demanda foi tal que xa quedan moi poucas entradas dispoñibles. “Queremos que este festival sexa o mellor de Galicia e, por que non dicilo, de España”, afirmou Francisco Javier García, presidente da ACAE, nunha entrevista en Radio Líder Santiago.

O evento, que comezou con catro grupos locais, conta hoxe con artistas de renome. Entre os invitados destacan a Orquesta Sinfónica de Acordeones de Bilbao, a Banda de Acordeóns Metropolitana de Mos e o coro do Colexio Plurilingüe de Oca. “Levamos dous anos detrás da Orquestra Sinfónica de Bilbao e, ao final, aceptaron vir porque viron a nosa ilusión”, explicou García, facendo referencia ao prestixio que o festival está acadando.

A historia do festival é tamén a historia dunha paixón compartida. “Na Estrada pasamos de ser 8 acordeonistas afeccionados a máis de 45 músicos na asociación”, destacou o presidente.

O acordeón é moito máis que un instrumento para os membros de ACAE. “Para min foi unha vía de escape”, confesou Mari Carmen Barcala, vocal da asociación, que admitiu que ao principio tiña «moito pánico escénico». Pola su banda, García confesou que comezou a tocar con 49 anos, quen, tras comezar coa gaita, decidiu desafiarse a si mesmo e aventurarse no mundo do acordeón, alentado polo seu irmán.

A asociación tamén traballa na formación de novas xeracións, levando a música a escolas e integrando nenos no festival. “Temos un neno de 3 anos, Enzo, que xa está empezando”, mencionou García con orgullo.

Desde o segundo ano do festival, a organización tivo que buscar solucións para a gran demanda de público. “No segundo ano moita xente quedou fóra. Pensamos en buscar outro espazo máis grande, pero os técnicos desaconsellárono porque perderíamos calidade musical”, explicaron. As entradas están á venda no Departamento de Cultura do Concello da Estrada.

O orzamento do festival xa supera os 30.000 euros, e grazas ao apoio da Xunta de Galicia, a Deputación de Pontevedra, o Concello da Estrada e patrocinadores privados, o evento segue medrando.

O éxito do festival xa está xerando expectativas para o próximo ano. “Xa estou traballando na quinta edición. Non queremos ser un festival máis, queremos ser o mellor de Galicia, e porque non, de España”, asegurou García. “O acordeón ten futuro, e nós imos seguir traballando para que este festival sexa cada vez máis grande”, concluíu.

A entrevista completa, no seguinte enlace.