O PP de Santiago denuncia o «lamentable estado de abandono» do Refuxio de Animais de Bando

• O último episodio é a denuncia dun sindicato que reclama, entre outras cousas falta de persoal; acinamento e superpoboación de animais; incremento dos riscos laborais; ausencia de persoal de limpeza para zonas comúns, entre outros.
• “Os traballadores e afectados amósanse desesperados, -dixo Adrián Villa- porque son anos de pasotismo absoluto por parte das diferentes alianzas tripartitas (BNG-CA-PSOE), o que provocou que hoxe, en 2025, a situación do Refuxio de Bando sexa xa crítica e insostible”.

O concelleiro do Partido Popular de Santiago, Adrián Villa, denunciou hoxe, en rolda de prensa “o lamentable e deplorable estado de abandono” no que o BNG mantén o Refuxio de Animais de Bando, tal e como demostra o asunto que nos trae hoxe aquí, “un novo fronte moi preocupante: a reclamación, ante a Inspección de Traballo, de infraccións en materia de seguridade e hixiene nesta instalación”.

“Esta denuncia -explicou Villa- está interposta polo sindicato UXT e é consecuencia de que os nacionalista fixeron caso omiso á advertencia que o Partido Popular de Santiago fixo hai xa un ano”. O edil popular remarcou que o sindicato denuncia: falta de persoal; acinamento e superpoboación de animais; incremento dos riscos laborais; ausencia de persoal de limpeza para zonas comúns, entre outros.

O edil popular remarcou que, en setembro de 2024, este sindicato falou diante do padroado, expuxo esta situación e “suplicou” unha reacción por parte do BNG, pero a realidade é que, desde aquela seria advertencia, os nacionalistas non fixeron nada, cando tiveron máis de 5 meses para dotar economicamente ao Refuxio.

“Os traballadores e afectados -dixo- amósanse desesperados, porque son anos de pasotismo absoluto por parte das diferentes alianzas tripartitas (BNG.CA-PSOE), o que provocou que hoxe, en 2025, a situación do Refuxio de Bando sexa crítica e insostible”.

Adrián Villa destacou que, hai un ano, chamáronnos alarmistas e, seguramente, o sigan facendo hoxe, pero estamos ante unha situación moi seria, porque están a xogar co benestar dos animais e, por se isto fose pouco, os traballadores están a soportar unha situación laboral límite e, polo tanto, se está a dificultar a súas tarefas de coidado e mantemento dos animais”.

Así, destacou o edil popular pedímoslle ao BNG que leven a cabo programas de prevención de abandono; colaboración para o benestar, como a esterilización e alimento das colonias felinas; e campañas de implantación de microchip, “exemplos -remarcou- de cousas esenciais das que nada se ten feito”.

“Reitero que houbo advertencias que non quixeron escoitar, pedíronse reunións por parte de todos: veciños, voluntarios, traballadores, padriños e madriñas do Refuxio e asociacións, entre outros, pero ditas xuntanzas ou non tiveron lugar ou chegaron tarde”.

O concelleiro popular remarca que “pedimos responsabilidade e unha reacción urxente ante este grave problema, nós estamos sensibilizados, como gran parte da poboación, pero, polo que parece, o que non a ten é o goberno do BNG”.

“Non queremos boas palabras nin declaracións de intencións por parte do BNG, queremos implicación directa e feitos económicos, que muden por completo esta situación que a tantos animais e persoas está a afectar”, concluíu.

Antecedentes

O edil popular destacou que “xa no ano 2023, recibimos as primeiras alertas por parte de traballadores, voluntarios, madriñas e padriños e, sobre todo, por parte da veciñanza que, coma nós, está sensibilizada e preocupada polo benestar animal”.

“Así, en xaneiro de 2024 -explicou- denunciamos publicamente o que estaba a pasar en dita instalación e que tampouco sabíamos se nos orzamentos dese ano ía a haber algunha partida para o Refuxio e  se, en consecuencia, habería un incremento económico para o Refuxio de Animais de Bando”.

Cabe sinalar que, durante o ano 2024, recolléronse máis de 12.000 sinaturas, nunha campaña na plataforma Change.org, por parte de persoal voluntario, para salvar o Refuxio de Animais de Bando e para que se cumpra a Lei de Benestar Animal” e remarcou que “nós levamos este asunto ao Pleno, reclamando a necesidade dun incremento económico e, en abril, voltamos a denunciar a falta de implicación dos nacionalistas”.

“Todas as persoas que, nalgún momento, estiveron en contacto co Refuxio -indicou- falan de incumprimentos como: acinamento de animais en espazos reducidos; falta de hixiene; filtracións de auga; pelexas; falta de luz ou de ventilación, entre outras”.

“No pasado Pleno de xaneiro, -destacou- abríuselle outra fronte ao BNG, logo de que mantivésemos reunións coa veciñanza e denunciáramos no Pleno problemas coas colonias de gatos, por deixadez de funcións en relación coa atención, control, limpeza e coidado das colonias felinas, sobre todo, en zonas como a avenida de Salamanca, sen esquecer que o BNG perdeu unha subvención do goberno central.