O PP de Santiago pide a dimisión inmediata de Goretti Sanmartín tras un incendio con operativo insuficiente

O Partido Popular de Santiago lanzou esta mañá un comunicado urxente no que demanda a dimisión inmediata da alcaldesa, Goretti Sanmartín, á que sinala como “máxima responsable” da situación que, segundo denuncian, vive o servizo de Bombeiros de Compostela.

Os populares agradecen o labor dos bombeiros de Santiago, que “hoxe puxeron a súa vida en perigo acudindo a un incendio cun equipo insuficiente”, así como o apoio prestado polos efectivos de Brión e Ordes, que permitiu entre todos evitar “unha posible traxedia con perda de vidas”.

No comunicado, o PP acusa o goberno municipal formado por BNG e Compostela Aberta, co apoio do PSOE, de ter a cidade “nunha situación límite”. Pregúntanse “que máis ten que pasar” e responsabilizan directamente a alcaldesa “do caos, a desorde e de poñer en risco a vida dos santiagueses”.

Ademais, advirten de que farán a Goretti Sanmartín “responsable penalmente de calquera dano persoal que poida sufrir un cidadán ou un bombeiro” debido, afirman, á “inactividade neglixente” do goberno local para resolver un problema “que só require vontade política”.