O PP denuncia a «ocultación de información» de BNG e CA nas negociacións con Ryanair

• María Baleato subliñou que “os nacionalistas está a obstaculizar a nosa labor de oposición ao non ternos aportada a documentación que lle solicitamos dende hai tempo, polo que agardamos que nos fagan chegar dita información, senón verémonos obrigados a tomar outras medidas”.
• “O que queremos saber, -dixo- é canto destinou o Concello de Santiago a financiar á compañía Ryanair porque, de ser o caso, sería unha completa irresponsabilidade e un despilfarro dos fondos públicos”.

A concelleira do Partido Popular de Santiago, María Baleato, denunciou hoxe, en rolda de prensa, a ocultación de información por parte do goberno de BNG e CA, en relación ás negociacións que teñen levado a cabo coa compañía aérea Ryanair. A popular subliñou que “os nacionalistas están a obstaculizar a nosa labor de oposición, ao non ternos aportada a documentación que lle temos solicitado dende hai tempo, polo que agardamos que nola faciliten, senón verémonos obrigados a tomar outras medidas”.

“Os nacionalistas non nos responden á cuestión formulada, o que queremos saber é canto destinou o Concello de Santiago a financiar a compañía Ryanair porque, de ser o caso, sería unha completa irresponsabilidade e un despilfarro dos fondos públicos”.

A edil popular destacou que “temos dereito a coñecer os antecedentes, os datos ou informacións que obran en poder dos servizos do goberno nacionalista e que resultan precisos para o desenvolvemento da nosa función e o goberno de BNG e CA non está a darnos a información que lle solicitamos, vulnerando, deste xeito, o noso dereito fundamental, porque estamos dentro do núcleo da función representativa”.

Baleato remarcou que “o peche da base da compañía é un asunto que levamos ao Pleno, que denunciamos publicamente, que nos preocupou e segue a facelo e, por iso, lle preguntamos ao goberno de BNG e CA que cantidades do orzamento de Incolsa foron destinadas ás compañías aéreas que operan en Santiago, concretamente, nos anos 2023, 2024 e 2025”.

Ademais, insistiu , “esta semana, a concelleira de Turismo, Miriam Louzao vinculou a caída do turismo coa retirada de voos por parte desta empresa, dicindo que a relación coa caída é obvia, posto que, en xaneiro de 2025, tiñamos sete conexións estatais que agora non temos, o que fai que levante o noso interese en Ryanair”, explicou.

A popular indicou que “o PP de Santiago formulou a pregunta o 15 de decembro, rexistrámola de entrada ao día seguinte e obtivemos a resposta da alcaldía o 13 de febreiro de 2026, é dicir, a alcaldesa resposta fóra de prazo e, ademais, nos nega, por escrito, a información solicitada”.

María Baleato destacou que o que “os nacionalistas nos respostan é que os créditos iniciais do orzamento de INCOLSA destínanse ás campañas de marketing en Europa e on line no Reino Unido, Italia e Alemaña; e se nos recorda que a discreción é unha virtude necesaria para poder negociar acordos con cantidades realistas e asumibles e que o PP conta coa correspondente representación no consello de administración de Turismo de Santiago que, entenden, é o lugar para tratar estes temas que están suxeitos á confidencialidade debida”.

“É inxustificable -aclarou- que se amparen na discreción como virtude para negociar acordos, porque nós somos perfectamente coñecedores da normativa e é o noso deber gardar reserva en relación coas informacións facilitadas, polo tanto non podemos facer outra cousa que denunciar publicamente a vulneración do noso dereito de acceso á información”.

Baleato insistiu en que “estamos diante de información relativa a actos de xestión administrativa con repercusión económica ou orzamentaria: contratos, convenios subscritos, subvencións ou axudas públicas concedidas, polo tanto temos dereito a coñecer as obrigas económicas asumidas ou os importes destinados a Ryanair”.

Na actualidade, o aeroporto de Santiago-Rosalía de Castro está a atravesar unha difícil situación, onde a redución de voos afecta á caída das pernoctacións na cidade, foron 16.033 menos (segundo os datos do INE), o que deixou un nivel de ocupación do 30,38% fronte ao 41,60% de xaneiro do 2025 (10 puntos de caída).