O PSdeG rompe toda vinculación con José Tomé tras as acusacións de presunto acoso sexual

O Partido Socialista de Galicia anunciou a ruptura total da súa relación con José Tomé tras coñecerse diversas informacións sobre un presunto caso de acoso sexual na provincia de Lugo. A decisión, adoptada en coordinación coa dirección federal do PSOE, chega ante a “gravidade das acusacións” e supón a suspensión da súa militancia, a dimisión como presidente da Deputación de Lugo e o abandono inmediato de todos os grupos socialistas.

Nun comunicado oficial, o PSdeG cualifica os feitos coñecidos como “tristes e repugnantes” e asegura que xa están a ser investigados “con todas as consecuencias”, subliñando que o partido “chegará ata o final”. A formación socialista expresa tamén o seu apoio ás vítimas de calquera tipo de conduta machista, ás que transmite “afecto, respaldo e solidariedade”, reafirmando a súa política de “tolerancia cero” fronte a este tipo de comportamentos.

Desde hoxe, José Tomé “xa non ten ningunha vinculación co Partido Socialista”, segundo sinala o comunicado. A dirección do PSdeG indica que estas decisións son as que “tiña que facer” e as que lle foron esixidas polo partido, incluída a entrega das súas actas.

O PSdeG lembra que non ten coñecemento de ningunha denuncia formal na súa canle interna contra o acoso, ao tratarse dun sistema que garante o anonimato das vítimas. Por este motivo, pide respecto para a persoa afectada e confianza no traballo do Órgano contra o Acoso, encargado de investigar os feitos con independencia e garantías.

A formación socialista reitera o seu compromiso coa loita contra as condutas machistas e lembra que dispón dunha canle específica que garante confidencialidade, intimidade e anonimato para facilitar que as vítimas poidan denunciar nun entorno seguro.

Por último, o Partido Socialista de Galicia anuncia que proporá á Executiva Federal o nomeamento inmediato dunha comisión xestora na provincia de Lugo para garantir o funcionamento orgánico da formación tras a saída de José Tomé.