Os autónomos convocan unha manifestación en Santiago o 30 de novembro

A mobilización do colectivo de autónomos chegará este sábado 30 de novembro, ás 11:00 horas, ao Paseo Central da Alameda de Santiago, nunha convocatoria que busca visibilizar a situación deste sector e reclamar melloras nas súas condicións laborais.

Baixo o lema “¡Por unas condiciones de trabajo dignas!”, os organizadores esixen condicións xustas, redución das cotas, maior protección social e o recoñecemento real do seu traballo. Trátase dunha protesta impulsada de maneira independente, sen vinculación con partidos políticos nin ideoloxías, e cun carácter pacífico.

A convocatoria nace dende un movemento social promovido a través das redes, no que numerosos profesionais por conta propia aseguran sentirse afogados polo incremento de custos, a carga fiscal e a falta de medidas específicas de apoio. O chamamento pretende reunir a autónomos de toda Galicia para facer visible unha realidade que, segundo denuncian, condiciona a viabilidade de moitos proxectos empresariais.

Os organizadores animan a participar a todas aquelas persoas que queiran apoiar a causa, e lembran que o tecido autónomo é esencial na economía galega e nacional. A manifestación contará tamén cun espazo informativo accesible mediante un código QR incluído no cartel oficial da convocatoria.