Os bombeiros de Santiago realizaron 76 intervencións nos últimos catro días por mor das borrascas

As borrascas Ivo e Herminia deixaron en Santiago numerosas incidencias nos últimos catro días, que motivaron ata 76 intervencións dos bombeiros desde o pasado domingo ata o mediodía de hoxe. A maioría delas, 35, foron para a retirada de árbores danadas polos fortes ventos.

A borrasca Herminia foi a que deixou máis incidencias en Santiago. O Servizo de Extinción de Incendios e Salvamento realizou 22 intervencións no domingo 26 de xaneiro; e 29 no luns 27. Onte foron 13 as saídas dos bombeiros, e ao longo da mañá de hoxe contabilizáronse unha ducia.

Por tipoloxía, a maioría das incidencias son derivadas dos fortes ventos que trouxeron consigo as tempestades Herminia e Ivo. Así, foi precisa a retirada de ata 35 árbores, a inmensa maioría delas na zona rural. Fixéronse 16 actuacións de saneamento de fachadas e tellados, por elementos desprendidos ou con risco de desprendemento polos refachos de aire; e actuouse tamén en cinco puntos por mor de problemas con postes ou cableado eléctrico. Por último, os bombeiros actuaron en cinco puntos por anegamentos ou balsas de auga.