Os parques infantís das prazas de Galicia e Vigo reabren tras a súa posta a punto

Os parques infantís da Praza de Galicia e da Praza de Vigo reabren este martes á veciñanza despois da súa posta a punto. Pola súa parte, continúan os traballos na Praza de Agros de Ramírez (Praza Roxa), que pechou o pasado luns para executar os traballos de reparación do firme do parque e substitución e reparación de elementos, entre outros traballos.

Esta actuación que leva a cabo a Concellaría de Servizos Básicos Comunitarios, Parques e Xardíns e Vías e Obras, que dirixe Xesús Domínguez, se corresponde coa contratación de actuacións urxentes de reparación en tres parques infantís, adxudicado a OURI ENTRETENIMIENTOS SL por un total de 54.497,10 euros.

O prazo de execución total é de dous meses, polo que está previsto que no mes de maio rematen as actuacións no parque da Praza Roxa.

As obras consisten no reforzo e mellora do pavimento, subministración e colocación de céspede artificial e reparación ou susbtitución de diversos elementos de xogo, así como traballos menores de reaxuste e pintura.

Contrato de mantemento

Adicionalmente, a xunta de goberno local aprobou o 30 de abril o expediente de contratación do Servizo de conservación e mantemento integral das áreas de xogo infantís do Concello de Santiago de Compostela, cun orzamento base de licitación de 1.236.111,84 euros (IVE incluído).