Portas abertas en Sar para o Monbus Obradoiro-Porto

O luns 1 de setembro, o equipo dirixido por Epi medirase ao Porto no que será o seu primeiro encontro amigable en Santiago de Compostela.

A pretempada xa está en marcha e chega un dos momentos máis agardados pola afección: ver en acción aos xogadores que defenderán o escudo na nova campaña. Aínda que non será o primeiro partido de preparación, si será o primeiro que se dispute no Multiusos Fontes do Sar.

Para que a afección poida animar de preto, o club decidiu abrir as portas do pavillón, de xeito que calquera seareiro/a poida asistir ao choque. A entrada será de balde. O partido comezará ás 19:00 horas e as portas abriranse unha hora antes.

Este encontro entre Monbus Obradoiro e Porto servirá de antesala á Copa Galicia, que se xogará os días 5 e 6 de setembro. Ademais, podería haber outro partido no Sar antes de que comece a liga, pendente de confirmación para a fin de semana do 19 de setembro, como previa á primeira xornada ante o Hestia Menorca en Baleares.