Radio Líder contarache o papel das institucións e empresas galegas en FITUR 2025

O presidente da Xunta, Alfonso Rueda atendendo a Álvaro Veiga en Fitur 2024

Radio Líder volve a FITUR 2025 do 22 ao 26 de xaneiro para ofrecer unha ampla cobertura especial sobre o papel das institucións e empresas galegas na consolidación de Galicia como un destino turístico acolledor, auténtico e de proxección internacional. Este ano, o equipo estará formado por catro profesionais que seguirán de preto os principais actos do stand galego en Ifema, incluíndo presentacións, encontros institucionais e demostracións culturais.

Tras o éxito da súa participación en FITUR 2024, onde se destacou como a única radio galega con cobertura multimedia nos días profesionais da feira, Radio Líder redobra o seu compromiso coa difusión do turismo galego. O stand de Galicia, que na pasada edición foi galardoado como «Mellor Stand de FITUR», será o centro de atención dunha programación que integrará elementos da natureza de costa e interior, clima como refuxio, biodiversidade, patrimonio material e inmaterial, e a aposta por unha Galicia sustentable e en harmonía coas demandas do turismo actual.

Con máis de 1.100 m² de espazo, 25 metros de pantallas LED e unha programación chea de actividades, o stand galego, baixo o lema «Xa estás en Galicia!», transmitirá sensacións que convidan a vivir experiencias enriquecedoras. Turismo de Galicia desenvolverá 47 presentacións ao longo dos tres primeiros días da feira, dirixidas ao sector profesional, mentres que a fin de semana estará aberta ao público xeral, cun programa que incluirá actuacións culturais e demostracións de artesanía.

A audiencia de Radio Líder en Galicia poderá seguir esta ampla cobertura a través da súa rede de emisoras, plataforma dixital, redes sociais, podcast e app.