San Xoán en Santiago: máis de trinta celebracións con cacharelas e sardiñas en espazos públicos

O Concello de Santiago ten autorizadas para esta noite un total de 31 celebracións en diferentes espazos públicos: 12 cacharelas con sardiñada; 12 sardiñadas e 7 cacharelas. Estes eventos súmanse aos que xa se celebraron durante a pasada fin de semana e os que están autorizados para o vindeiro sábado, ata superar as 50 festas de San Xoán. Ademais, o Concello recibiu comunicación previa para a celebración de 587 cacharelas e sardiñadas en espazos privados.

Como é habitual, esta noite haberá un reforzo dos efectivos da Policía Local e dos Bombeiros para atender calquera posible incidencia, tamén en coordinación coa Policía Nacional.

23 actividades en Mazarelos

A praza de Mazarelos acollerá na tarde do día 23 obradoiros e música en directo nunha xornada lúdica para por en valor a importancia das Festas de San Xoán, con gran tradición no conxunto do municipio. Estas actividades, abertas a todos os públicos, diríxense especialmente a un público familiar, tanto residente como visitante. Ademais, durante todo o día haberá un punto de información co obxectivo de descentralizar a asistencia ás múltiples cacharelas que se organizan nos diferentes barrios e parroquias de Compostela.

Dende as 16.00 as 21.00 horas haberá un pasarrúas a cargo de A.C. Argalleiros, que animarán a zona durante toda a tarde, nas horas previas ao acendido das cacharelas nos barrios e parroquias de Compostela. A partires das cinco comezarán os diferentes obradoiros, todos eles gratuítos, pero para os que é recomendable facer reserva previa.

Os obradoiros que se desenvolverán en diferentes sesións son: “Obradoiro de Herbas de San Xoán”, “Obradoiro de baile galego”, “Obradoiro de pandeireta e percusións” e  “Obradoiro de Xogos con música”. Tamén haberá auga de herbas xa preparada para levar e a última hora repartiranse herbas de San Xoán para preparar na casa a auga de herbas tradicional (ata finalización de stock).

Ademais destes obradoiros en Mazarelos, haberá tamén “Paseos botánicos para a recollida de herbas de San Xoán” paseando pola senda do río Sar. O punto de encontro é a ponte vella do Sar. Faranse un dous pases pola mañá, ás 10.00 e ás 11.30 horas, e outros dous pola tarde, ás 17.00 a ás 18.30 horas. Tamén é recomendable facer reserva previa de praza.

Ás 21.30, para rematar a xornada, Mazarelos acollerá unha actuación musical do grupo Cantigas e Agarimos, que continuará cunha foliada aberta ao público.

Normas de seguridade e convivencia

O Concello ten publicadas unha serie de instrucións para garantir a seguridade nas cacharelas e/ou sardiñadas. Se a súa celebración se produce en zona urbana o volume de combustible da cacharela non excederá os 2 metros de diámetro, nin 6 metros de perímetro, nin un metro de altura. Na zona rural, non excederá os 3 metros de diámetro, nin 9 de perímetro, nin 3 metros de altura. En todo caso, as fogueiras estarán afastadas de vivendas e vehículos, de masas arbóreas ou zonas vexetais, e non se situarán baixo tendidos eléctricos ou telefónicos.

Como é habitual, estará prohibido queimar pneumáticos, plásticos, espumas de poliuretano, aceites, e en xeral de calquera substancia que ao arder desprenda fume tóxico, así como recipientes de líquidos inflamables ou sprays.

No caso das cacharelas sobre enlousados, será obrigado protexer o pavimento cunha capa de area de 10 centímetros. Este ano, como novidade, a area para a celebración de cacharelas públicas foi entregada polo Concello ás persoas ou entidade organizadoras.