Santiago debate a implantación da taxa turística: vantaxes, riscos e dilemas sociais

A implantación dunha taxa turística en Santiago de Compostela foi o centro da tertulia política emitida en Radio Líder Santiago, onde Ramón Quiroga, Rubén Cela, María Vilas e Paco Reyes analizaron os retos e oportunidades desta medida.

Ramón Quiroga: «Non somos Barcelona nin Palma de Mallorca»

Ramón Quiroga, exviceportavoz do Partido Popular en Santiago de Compostela, foi contundente ao rexeitar a taxa turística na súa configuración actual. Para Quiroga, «Santiago é unha cidade de 100.000 habitantes que non pode ser comparada con destinos como Barcelona» e advertiu contra o que considera un «falso debate» sobre a turismofobia. Propuña, no seu lugar, «medidas preventivas como regular os fluxos turísticos, poñer máis guías e mellorar a ordenación antes de aplicar unha taxa.»

Rubén Cela: «A taxa turística é necesaria e xusta»

O exportavoz municipal do BNG, Rubén Cela defendeu que os turistas deben contribuír aos custos que xeran para a cidade. «Hai veciños de Santiago que non se benefician directamente do turismo, pero que pagan impostos para cubrir gastos como a limpeza ou a seguridade,» afirmou. Cela destacou ademais que Santiago é un destino turístico inelástico: «Ninguén deixará de visitar Santiago porque cobre un euro por noite.» O exvoceiro do BNG propuxo tamén unha regulación autonómica para garantir a equidade: «Sería lóxico un sistema centralizado a nivel galego como o canon eólico.»

María Vilas: «Hai temas máis urxentes para Santiago»

María Vilas, de exdeputada de Ciudadanos no Congreso, puxo o foco nas prioridades esquecidas da cidade. «Santiago leva anos á deriva, sen un proxecto claro de cidade,» criticou. Aínda que non descartou a medida, pediu prudencia: «Non somos Madrid nin Granada. É imprescindible saber para que se vai destinar o recadado e garantir que reverta nos cidadáns.» Vilas alertou de posibles inxustizas: «Estariamos penalizando os turistas que pernoctan legalmente, mentres que outros non contribuirían en absoluto.»

Paco Reyes: «O turismo é clave, pero cómpre diversificar»

Paco Reyes, exportavoz socialista en Raxoi, destacou a importancia do turismo como motor económico da cidade, representando o 21% do PIB local. «Non somos unha cidade monocultivo, pero o turismo é unha parte fundamental,» afirmou. Reyes insistiu na necesidade de evitar a turistificación mediante «a descentralización, a diversificación da oferta e a desestacionalización.»

Un debate sen consenso inmediato

O debate deixou clara a división de opinións, pero tamén revelou puntos de acordo: a importancia de planificar a medida con rigor e de garantir que os ingresos beneficien tanto á cidade como aos seus habitantes. Como resumiu Rubén Cela, «a clave non é taxa turística si ou non, senón para que.»