Só tres bombeiros para todo Santiago: o servizo leva máis dun mes sen cumprir mínimos operativos

O servizo de Bombeiros de Santiago volveu rexistrar hoxe unha dotación mínima composta únicamente por tres efectivos e un mando para cubrir toda a cidade. Segundo denuncia o corpo, esta situación repítese desde hai máis dun mes, sen que a administración achegara ata o momento unha solución que permita garantir unha resposta operativa ante emerxencias.

A falta de persoal obriga a funcionar por debaixo dos mínimos establecidos, o que, segundo alertan, deixa o servizo “incapaz de garantir unha resposta mínima” e imposibilita atender dúas incidencias simultáneas. Os profesionais cualifican o escenario como “extremadamente perigoso”.

A situación complícase aínda máis porque os parques de bombeiros de Ordes, Arzúa e Ribeira, que deberían actuar como apoio a Santiago, tamén están a sufrir peches e carencias de persoal, polo que tampouco poden asegurar cobertura cando a capital galega non pode responder.

Os bombeiros advirten de que Santiago depende neste momento dun sistema “non operativo, non seguro e non garantido”, que deixa á cidadanía “desprotexida” e aos profesionais “expostos ao límite”.

Segundo explican, unha única emerxencia de relevancia podería colapsar por completo o servizo, incrementando o risco para a poboación. Critican ademais que, mentres persiste esta situación, os responsables políticos limítense a “botar balóns fóra” e a falar de “herdanzas e culpas pasadas”.

Os bombeiros conclúen cunha advertencia:
a cuestión xa non é canto tempo se prolongará esta situación, senón canto tempo poderá resistirse sen que se produza unha traxedia.